گوگل کی جانب سے ٹرانسلیٹ کی 20 ویں سالگرہ کے موقع پر ایک نیا فیچر متعارف کرایا ہے۔
ویسے تو انٹرنیٹ پر ہر چیز کو جاننے کے لیے لوگ گوگل کا رخ کرتے ہیں۔
مگر آپ انگلش زبان بولنا سیکھنا چاہتے ہیں تو گوگل اس میں بھی آپ کی مدد کرنے کے لیے تیار ہے۔
جی ہاں واقعی اب صحیح معنوں میں آپ کہہ سکتے ہیں کہ انگلش یا کوئی بھی زبان سیکھنی ہے تو گوگل کریں۔
گوگل کی جانب سے گوگل ٹرانسلیٹ کی 20 ویں سالگرہ کے موقع پر آرٹی فیشل انٹیلی جنس (اے آئی) ٹیکنالوجی پر مبنی فیچر کا اضافہ کیا گیا ہے۔
یہ پروناؤنسیشن پریکٹس ٹول مختلف زبانوں بولنے کی مہارت میں مدد فراہم کرے گا۔
یہ فیچر کسی زبان کو سیکھنے کے حوالے سے ہے جس کا مقصد کسی زبان کو سیکھنے کے خواہشمند افراد کو بولنے کی مشق کرانا ہے یا اس زبان کے الفاظ کو سیکھنے میں مدد فراہم کرنا ہے۔
کمپنی کی جانب سے ایک بلاگ پوسٹ میں بتایا گیا کہ گوگل ٹرانسلیٹ کی اینڈرائیڈ ایپ میں یہ ٹول صارفین کو دستیاب ہوگا۔
کمپنی کے مطابق یہ ٹول صارفین کو ایپ کے اندر مختلف زبانوں کو بولنے کی سہولت فراہم کرے گا۔
یہ ٹولز مختلف فیچرز آسک اور انڈر اسٹینڈ پر مبنی ہے جو تناظر اور متبادل ذرائع فراہم کرتا ہے۔
اس نئے آپشن میں اے آئی کو صارف کی جانب سے بولے جانے والے الفاظ کے تجزیے کے لیے استعمال کیا جاتا ہے اور فوری فیڈ بیک فراہم کیا جاتا ہے، اس طرح صارفین کو کسی نئی زبان کے الفاظ کا تلفظ درست کرنے میں مدد ملتی ہے اور حقیقی دنیا میں بات چیت کرنا آسان ہو جاتا ہے۔
گوگل نے بتایا کہ یہ فیچر ابھی امریکا اور بھارت میں دستیاب ہے۔
اس فیچر میں انگلش، اسپینش اور ہندی زبانوں کی سپورٹ دی گئی ہے اور یہ پریکٹس سیکشن میں پروناؤنس کے نام سے دستیاب ہوگا۔
جب کسی صارف کی جانب سے پروناؤنس کو سلیکٹ کیا جائے گا تو ایپ اس کی بات چیت کو سن کر تجزیہ کرے گی کہ اس کے الفاظ کا تلفظ کس حد تک درست ہے اور غلطی پر فوری طور پر درست کیا جائے گا۔
گوگل کے مطابق گوگل ٹرانسلیٹ میں اب لگ بھگ 250 زبانوں کی سپورٹ موجود ہے جبکہ اسے ایک ارب سے زائد افراد دنیا بھر میں استعمال کرتے ہیں۔
کمپنی نے یہ دلچسپ انکشاف بھی کیا کہ دنیا بھر میں 20 سال کے دوران سب سے زیادہ ترجمہ کیا جانے والا جملہ تھینک یو تھا جس کے بعد ہاؤ آر یو دوسرے، آئی لو یو تیسرے، ہیلو اور پلیز بتدریج چوتھے اور 5 ویں نمبر پر رہے۔
Leave a Reply