لاہور: پنجاب حکومت نے لاہور کی سڑکوں اور عمارتوں کے پرانے نام بحال کرنے کا فیصلہ کیا ہے۔
وزیراعلیٰ پنجاب مریم نواز اور صدر مسلم لیگ (ن) نواز شریف کی زیر صدارت اجلاس میں شہر کے تاریخی ورثے کی بحالی سے متعلق اہم فیصلے کیے گئے۔
اجلاس میں لاہور کی سڑکوں اور گلیوں کے پرانے نام بحال کرنے، یونیورسٹی کا درجہ پانے والے سرکاری کالجز کے بھی اصل نام بحال کرنے کا فیصلہ کیا گیا۔
اجلاس میں قدیمی اور تاریخی عمارتوں کی بحالی کے منصوبوں پر رپورٹ پیش کی گئی اور جاری منصوبوں کی پیشرفت کا تصویری جائزہ بھی لیا گیا۔
اجلاس میں یہ بھی فیصلہ کیا گیا کہ ٹولنٹن مارکیٹ کے عقب میں کانونٹ گارڈن بنایا جائے گا جس میں سیمی کورڈ ایریا اور دکانیں بھی قائم کی جائیں گی۔
اجلاس میں نیو میوزیم بلاک میں ورلڈ کلاس گیلریز بنانے کا فیصلہ کیا گیا جہاں قدیمی اسلحہ، سکے، چائنیز اور سکھ گیلریاں قائم کی جائیں گی جب کہ انٹرایکٹو اسکرینز بھی سیاحوں کی دلچسپی کا مرکز ہوں گی۔
اس کے علاوہ شاہ عالم گیٹ سے رنگ محل چوک تک راستے کو پیدل گزرگاہ میں تبدیل کرنے کا فیصلہ کیا گیا۔
اجلاس میں لاہور کی 8 قدیمی اور تاریخی گزرگاہوں کی بحالی اور قدیمی شہر میں مریم زمانی مسجد سمیت دیگر تاریخی عمارتوں کی بحالی پر بھی اتفاق کیا گیا۔
Leave a Reply