واٹس ایپ میں ایسا نیا فیچر متعارف جو اب تک اس سروس میں دستیاب نہیں تھا

واٹس ایپ میں ایک ایسے فیچر کا اضافہ کیا گیا ہے جو اس میسجنگ پلیٹ فارم میں اب تک دستیاب نہیں تھا۔

اگر آپ گوگل کروم میں انکوگینٹو موڈ کو استعمال کرچکے ہیں تو ایسا ہی فیچر اب واٹس ایپ کے اندر بھی صارفین کو دستیاب ہوگا۔

واٹس ایپ کی جانب سے انکوگینٹو چیٹس ود میٹا اے آئی نامی فیچر متعارف کرانے کا اعلان کیا گیا ہے۔

جیسا نام سے ظاہر ہے کہ اس سے آپ میٹا اے آئی چیٹ بوٹ سے واٹس ایپ کے اندر پرائیویٹ چیٹ کرسکتے ہیں۔

پرائیویٹ سے مراد یہ ہے کہ کوئی بھی میٹا اے آئی سے ہونے والی ایسی چیٹ پڑھ نہیں سکے گا، یہاں تک کہ میٹا کمپنی بھی نہیں۔

کمپنی نے مزید بتایا کہ یہ انکوگینٹو موڈ واٹس ایپ میں دستیاب دیگر اے آئی چیٹ بوٹس کے لیے دستیاب نہیں ہوگا اور ان کو تیار کرنے والی کمپنیاں صارفین کے سوالات اور جوابات کو دیکھ سکیں گی۔

کمپنی کے مطابق میٹا اے آئی سے انکوگینٹو چیٹس کو ایسے محفوظ ماحول میں پراسیس کیا جائے گا کہ میٹا کو بھی ان تک رسائی حاصل نہیں ہوگی۔