بالی وڈ کے سینئر اداکار امیتابھ بچن کے گھر ’جلسہ‘ کے باہر ایک مداح شدید گرمی میں کئی گھنٹے انتظار کے بعد بےہوش ہو کر گر پڑا۔
بھارتی میڈیا رپورٹس کے مطابق یہ واقعہ اتوار کو پیش آیا جب سیکڑوں مداح اداکار کی ایک جھلک دیکھنے کے لیے جمع تھے۔
انسٹاگرام پر شیئر کی گئی ایک ویڈیو میں دیکھا جا سکتا ہے کہ ایک مداح اچانک سڑک پر گر گیا جس کے بعد کچھ افراد نے فوراً اسے سہارا دیا اور محفوظ جگہ پر بٹھا دیا۔
امیتابھ بچن اکثر اتوار کے روز مداحوں سے ملاقات کی تصاویر اور ویڈیوز اپنے بلاگ پر شیئر کرتے ہیں، انہوں نے حال ہی میں بتایا کہ انہوں نے اپنی سیکیورٹی ٹیم کو ہدایت دی کہ مداحوں کے ساتھ اچھا سلوک کیا جائے۔
اداکار نے لکھا کہ ’یہ میرا فخر اور اعزاز ہے کہ مجھے مداحوں کی دعائیں ملتی ہیں، وہ مجھے جینے کا حوصلہ دیتے ہیں، مجھے مزید محنت کرنے کی ترغیب دیتے ہیں۔ وہ میری ای ایف ہیں، میری ایکسٹینڈڈ فیملی۔‘
انہوں نے مزید کہا کہ ’اتنی دیر، اتنی دھوپ میں، گھنٹوں انتظار کرنا کوئی معمولی بات نہیں ہے۔ اس کے بعد اگر ان کے ساتھ اچھا سلوک نہ کیا جائے تو یہ درست نہیں۔‘
Leave a Reply