آپ نے سم کارڈز کو تو دیکھا ہی ہوگا، مگر کیا کبھی سوچا کہ ان سے لاکھوں روپے بھی کمائے جاسکتے ہیں؟
یقین کرنا مشکل ہوگا مگر چین میں ایک شخص نے ناکارہ سم کارڈز اور الیکٹرونکس کچرے سے سونا نکالا ہے۔
اس کا دعویٰ ہے کہ وہ اب تک ایسے سم کارڈز اور الیکٹرونکس کچرے سے 191 گرام سونا نکال چکا ہے۔
ایک رپورٹ کے مطابق صوبہ گوانگ ڈونگ سے تعلق رکھنے والے شخص چیاؤ نے ایک سوشل میڈیا پوسٹ میں یہ دعویٰ کیا۔
اس نے بتایا کہ وہ سم کارڈز اور دیگر کچرے سے قیمتی دھات کو نکالنے میں ماہر ہے۔
وہ سم کارڈز کو کیمیکلز میں ڈبوتا ہے اور پھر نکال کر گرم کرکے سونے کو الگ کرتا ہے۔
چیاؤ کے مطابق وہ اب تک سم کارڈز اور دیگر سے 191 گرام نکال چکا ہے جس کی مالیت لگ بھگ 2 لاکھ یوآن (80 لاکھ پاکستانی روپے سے زائد) ہے۔
چیاؤ نے بتایا کہ وہ اب تک لگ بھگ 2 ٹن اسکریپ کو سونا نکالنے کے لیے استعمال کرچکا ہے جس میں سم کارڈز، الیکٹرونکس چپس اور دیگر شامل ہیں۔
اس کا کہنا تھا کہ سم کارڈز کے اہم حصے گولڈ پلیٹڈ ہوتے ہیں۔
واضح رہے کہ ایک عام سم کارڈ میں 0.01 گرام سے کم سونا ہوتا ہے۔
چیاؤ کے مطابق اس نے یہ انکشاف اس لیے نہیں کیا کہ لوگ بھی ایسا شروع کر دیں بلکہ بس اپنا کام شیئر کیا ہے، عام لوگوں کے لیے ایسا کرنا آسان نہیں بلکہ خطرناک ثابت ہوسکتا ہے۔
Leave a Reply