‘ہم اسےکیس نمبر10میں لےلیں گے’، شاہزیب خانزادہ بھی شہزاد رائےکے نئےگانے ’لیٹ ہوگئے‘ کے معترف

فوٹو: اسکرین شاٹ

معروف پاکستانی گلوکار اور سماجی کارکن شہزاد رائےکے ملک کے تعلیمی نظام اور بچوں پر تعلیم کے دباؤ سے متعلق نئےگانے ’لیٹ ہوگئے‘ کو جہاں خوب پزیرائی مل رہی ہے وہیں جیو نیوز کے اینکر پرسن شاہزیب خانزادہ نے بھی سراہا ہے۔

شہزاد رائے کا گانا ’لیٹ ہوگئے‘ اس وقت خاصہ مقبول ہو رہا ہے، اس گانے میں اسکولوں میں بچوں کے داخلوں سے لے کر ان کی پیشہ ورانہ زندگی کے انتخاب سے متعلق معاشرتی رویوں کی عکاسی کی گئی ہے۔گانے میں شہزاد رائے نے ملک کے تعلیمی نظام کو تنقید کا نشانہ بنایا ہے اور یہ مسئلہ اجاگر کرنے کی کوشش کی ہے کہ ہمارا تعلیمی نظام بچوں کو تعلیم کے بجائے ان پر حد سے زیادہ دباؤ کا باعث بن رہا ہے۔

شہزاد رائے نےگانے میں بچوں کو تعلیم دلانے کے لیے والدین کی مشکلات، اسکول اور گھر میں الگ الگ زبان بولنے سے بچوں کو درپیش الجھن اور ٹیوشن کے معاملے کو بھی اٹھایا ہے۔

جہاں دیگر شعبہ ہائے زندگی کے افراد اس گیت کی تعریف کرتے نظر آرہے ہیں وہیں جیو نیوز کے اینکر پرسن اور حال ہی میں جیو ٹیلی ویژن کی مقبول ہونے والی سیریز کیس نمبر 9 کے مصنف شاہزیب خانزادہ بھی معاشرتی مسائل کو اُجاگر کرنے کےلیے شہزاد رائے کی تخلیقی صلاحیت کے معترف نظر آئے اور انہوں نے یہ گانا کیس نمبر 10 کیلئے مانگ لیا، جس پر شہزاد رائے رضامند بھی ہوگئے۔

انسٹاگرام اسٹوری پر شاہزیب خانزادہ نے شہزاد رائے کے گیت کا اسکرین شاٹ شیئرکرتے ہوئے لکھا کہ ’یہی وجہ ہےکہ ہر کوئی شہزاد رائے کو پسند کرتا ہے۔ کیا گانا ہے، کیا پیغام ہے۔‘

اس پیغام کو شہزاد رائے نے اپنے انسٹاگرام پر شیئر کیا اور ساتھ میں یہ لکھا کہ ’یہ کیس نمبر 10 ہے، آپ لیٹ ہوگئے۔‘ جس کے جواب میں شاہزیب خانزادہ نے شہزاد رائے کے نئے پیغام کو شیئر کرتے ہوئے لکھا کہ ’ہم اس گانے کو کیس نمبر 10 میں لے لیں گے۔‘

بات یہیں ختم نہیں ہوئی، بلکہ اسکرین شاٹ میں مزید اضافہ ہوا اور شہزاد رائے نے شاہزیب خانزادہ کے اسکرین شاٹ کو انسٹا اسٹوری کا حصہ بنایا اور گانے کی پیشکش کرتے ہوئے تحریر کیا کہ ’سر یہ گانا آپ کا ہوا‘، جس کے بعد شاہزیب خانزادہ نے اسی اسکرین شاٹ کو انسٹاگرام پر شیئر کرتے ہوئے یہ پیشکش کی کہ ’اور کیس نمبر 10 آپ کا‘۔