دنیا بھر میں مقبولیت حاصل کرنے والے اولین جنریٹیو آرٹی فیشل انٹیلی جنس (اے آئی) چیٹ بوٹس میں چیٹ جی پی ٹی سرفہرست ہے۔
چیٹ جی پی ٹی اب بھی دنیا کا مقبول ترین اے آئی چیٹ بوٹ ہے جو لگ بھگ ہر طرح کے سوالات کا جواب دے سکتا ہے۔
اوپن اے آئی کے تیار کردہ اس اے آئی چیٹ بوٹ نے ٹیکنالوجی کی دنیا کو بدل کر رکھ دیا ہے کیونکہ اب زیادہ تر بڑی کمپنیاں اسی ٹیکنالوجی کو بہتر بنانے کے لیے کام کر رہی ہیں۔
چیٹ جی پی ٹی پر جاکر آپ مختلف سوالات کے جواب جان سکتے ہیں، کوڈنگ سیکھ سکتے ہیں اور بھی بہت کچھ ایسا کر سکتے ہیں جو پہلے کرنا بہت مشکل ہوتا تھا۔
مگر کیا آپ نے کبھی سوچا کہ چیٹ جی پی ٹی ٹی میں جی کس لفظ کا مخفف ہے، یا پی سے کیا مراد ہے اور ٹی کس لفظ کی نمائندگی کرتا ہے؟
جی پی ٹی میں جی کس لطف کا مخفف ہے؟
جی پی ٹی میں جی سے مراد جنریٹیو ہے۔
اس اصطلاح کا مطلب یہ ہے کہ اے آئی سسٹم نئے ٹیکسٹ اور تناظر کو تیار کرسکتا ہے اور صرف تجزیہ نہیں کرتا۔
جنریٹیو اے آئی اے آئی ٹیکنالوجی کی ایک مخصوص قسم ہے جو ڈیپ لرننگ پروسسیس پر انحصار کرتی ہے جو کہ انسانی دماغ کے کام کرنے کے انداز سے متاثر ہے۔
جی پی ٹی میں موجود پی کا مطلب کیا ہے؟
جی پی ٹی میں پی سے مراد پری ٹرینڈ ہے اور یہ اس حقیقت کی عکاسی کرتا ہے کہ چیٹ جی پی ٹی کو بہت زیادہ مقدار میں ڈیٹا سے تربیت دی گئی۔
پری ٹرینڈ اے آئی ماڈلز کو ٹیکسٹ ڈیٹا سے تربیت دی جاتی ہے اور پھر عوام کے لیے متعارف کرایا جاتا ہے۔
چیٹ جی پی ٹی کو اوپن کرول نامی ڈیٹا سیٹ سے تربیت فراہم کی گئی جو اربوں ویب پیجز پر مشتمل ہے جن کو 2008 سے اکٹھا کیا گیا جبکہ دیگر ذرائع بھی استعمال کیے گئے۔
پری ٹرینڈ اے آئی سسٹمز انسانی فیڈ بیک سے بھی خود کو بہتر بناتے ہیں۔
جی پی ٹی میں موجود ٹی کس لفظ کی نمائندگی کرتا ہے؟
جی پی ٹی میں ٹی سے مراد ٹرانسفارمر ہے جو کہ ایک ڈیجیٹل نیورل نیٹ ورک ہے جو اس پلیٹ فارم میں کسی سوال پر ردعمل ظاہر کرتا ہے۔
یعنی ٹرانسفارمر ٹیکسٹ کو ٹوکنز میں تبدیل کرکے آپ کو جواب فراہم کرتا ہے۔
عمومی طور پر جی پی ٹی ایک لارج لینگوئج ماڈل ہے جو ڈیپ لرننگ اور نیورل نیٹ ورکس کو استعمال کرکے پہلے سے فیڈ ڈیٹا کے ذریعے آپ سے رابطہ کرنا سیکھتا ہے۔
تو یہ نام کیسے رکھا گیا؟
بظاہر چیٹ جی پی ٹی نام رکھنے کا فیصلہ آخری منٹ میں ہوا۔
ایک پوڈ کاسٹ میں اوپن اے آئی کے چیف ریسرچ آفیسر مارک چن اور چیٹ جی پی ٹی کے سربراہ نک ٹرولے نے بتایا کہ یہ نام اس اے آئی چیٹ بوٹ کو متعارف کرانے سے پہلے رکھا گیا تھا۔
پہلے تو اسے چیٹ ود جی پی ٹی 3.5 کا نام دیا گیا مگر اسے متعارف کرانے سے پہلے ایک میٹنگ میں فیصلہ کیا گیا کہ نام کو سادہ بنایا جانا چاہیے۔
تو ٹیم نے چیٹ جی پی ٹی تجویز کیا اور یہ سب کو پسند بھی آیا۔
Leave a Reply