امریکا کی ریاست نیویارک میں مسلح شخص نے فائرنگ کرکے پولیس افسر سمیت 5 افراد کو موت کے گھاٹ اتار دیا،بعد میں خود کو بھی گولی مارلی۔
فائرنگ کا واقعہ نیویارک شہر میں مڈٹاؤن مین ہٹن علاقے میں پیش آیا۔ جہاں مسلح شخص نے فائرنگ کرکے پولیس افسر دیدار الاسلام سمیت 5 افراد کو ہلاک کر دیا۔
اس واقعہ میں ایک پولیس افسر اور دوسرے شہری کو کمر میں گولیاں لگیں تاہم ان کی حالت خطرے سے باہر ہے۔
عینی شاہدین کا کہنا ہےکہ ایک شخص لمبی بندوق لے کر عمارت میں داخل ہوا تھا۔ یہ 634 فٹ بلند عمارت پارک ایونیو پر واقع ہے اور اس میں نیشنل فٹ بال لیگ اور بلیک اسٹون کے کارپوریٹ دفاتر بھی ہیں۔اس عمارت کی سکیورٹی غیرمعمولی طور پر زیادہ ہوتی ہے۔
حکام نے حملہ آور کی شناخت شین تامورا کے نام سے کی اور بتایا کہ وہ تنہا حملہ آور تھا۔ وہ رائفل لے کر عمارت کی لابی میں داخل ہوا جہاں پولیس اہلکار سے فائرنگ کا تبادلہ ہوا۔ بعد میں مسلح شخص 33 ویں فلور پر بھاگ گیا۔
حملہ آور کے بارے میں بتایا گیا ہے کہ وہ 27 برس کا لاس ویگاس کا رہائشی ہے۔
امریکی میڈیا کے مطابق ملزم کا مجرمانہ پس منظر نہیں تھا۔ وہ ہوائی میں پیدا ہوا اور نیواڈا منتقل ہوگیا تھا۔ اس کے پاس ہینڈگن کا لائسنس تھا اور پرائیویٹ تفتیش کار کا بھی لائسنس تھا جس کی مدت ختم ہوچکی تھی۔
میڈیا رپورٹس کے مطابق مسلح شخص نے خود کو گولی مار کر موت کے گھاٹ اتارا ہے۔
واضح رہے کہ امریکا میں اس سال یہ فائرنگ سے اجتماعی اموات کا 254 واں واقع ہے۔
Leave a Reply