فضائی حدود سے متعلق علامہ ناصر عباس کا ویڈیو بیان AI سے تیار کیا گیا

ایران پر امریکہ اور اسرائیل کے حملوں کے بعد سوشل میڈیا پر ایک ویڈیو تیزی سے گردش کر رہی ہے جس میں یہ دعویٰ کیا جا رہا ہے کہ سینیٹ میں اپوزیشن لیڈر علامہ راجہ ناصر عباس نے ایک ٹی وی ٹاک شو کے دوران الزام لگایا ہے کہ امریکہ نے ایران پر حملے کے لیے پاکستان کی فضائی حدود استعمال کیں۔

یہ دعویٰ غلط ہے۔ سینیٹر نے پروگرام کے دوران ایسی کوئی گفتگو یا ریمارکس نہیں دیئے۔

دعویٰ

3 مارچ کو ایکس (ٹوئٹر) پر صارف نے 18 سیکنڈ کا ایک ویڈیو کلپ شیئر کیا، جس میں اپوزیشن رہنما علامہ راجہ ناصر عباس کو ایک نجی نیوز چینل پر انٹرویو دیتے ہوئے دیکھا جا سکتا ہے۔

اس پوسٹ کا کیپشن کچھ یوں تھا: ”پاکستان، ایران پر حملے کے لیے اپنی فضائی حدود امریکہ اور اسرائیل کو دے رہا ہے۔ اس شیعہ رہنما کو سنیں۔“

اس ویڈیو میں علامہ ناصر عباس یہ کہتے ہوئے دکھائی دیتے ہیں کہ: ”میری آرمی کی ٹاپ لیڈر شپ سے کئی مرتبہ بات ہوئی، مگر پھر ہماری فوج نے امریکہ کو اپنا ائیر سپیس استعمال کرنے دیا، یہ بہت غلط ہے، بہت شرمناک ہے، ایران میں جو بھی کچھ ہورہا ہے اس کی ذمہ داری پاکستان پر ہے۔“

اس آرٹیکل کے شائع ہونے تک مذکورہ ویڈیو کو 46 ہزار سے زائد بار دیکھا گیا۔

حقیقت

علامہ راجہ ناصر عباس نے اس انٹرویو کے دوران پاکستان کی فضائی حدود کے امریکہ کی جانب سے استعمال ہونے سے متعلق کوئی تبصرہ نہیں کیا۔ درحقیقت، یہ پروگرام 2024 میں نشر ہوا تھا، جو رواں برس فروری میں ایران پر ہونے والے امریکی اور اسرائیلی حملوں سے بہت پہلے کی بات ہے۔

انٹرنیٹ پر گردش کرنے والا یہ کلپ علامہ ناصر عباس کے ایک نجی نیوز چینل کو 27 جولائی 2024 کو دیے گئے انٹرویو سے لیا گیا ہے۔ جیو فیکٹ چیک نے اس اصل ریکارڈنگ کا جائزہ لیا ہے جو کہ 40 منٹ سے زیادہ طویل ہے۔ اس پوری گفتگو کے دوران سیاسی رہنما نے کہیں بھی امریکہ کی جانب سے پاکستان کی فضائی حدود استعمال کیے جانے کا ذکر نہیں کیا۔

مکمل انٹرویو یہاں دیکھا جا سکتا ہے۔

جیو فیکٹ چیک نے یونیورسٹی ایٹ بفیلو کے ٹول ڈیپ فیک او میٹر (DeepFake-o-Meter) کے ذریعے بھی اس وائرل کلپ کا تجزیہ کیا۔ اس ٹول کے نتائج میں ویڈیو کے جعلی ہونے کا امکان 99.7 فیصد ظاہر کیا گیا، جو اس بات کی واضح نشاندہی ہے کہ یہ ویڈیو مصنوعی ذہانت (AI) کے ذریعے تیار کی گئی ہے۔

فیکٹ چیک: فضائی حدود سے متعلق علامہ ناصر عباس کا ویڈیو بیان AI سے تیار کیا گیا — یونیورسٹی ایٹ بفیلو کےڈیپ فیک او میٹر کے تجزیے کا اسکرین شاٹ، جس میں ویڈیو کے99.7 فیصد جعلی ہونے کا امکان ہے۔

اس کے علاوہ، آرٹیفیشل انٹیلیجنس (AI) مواد کی شناخت کرنے والے پلیٹ فارم ہائیو ماڈریشن (Hive Moderation) نے بھی اس ویڈیو کلپ کو 99.7 فیصد کا مجموعی اسکور دیا ہے، جو اس بات کی تصدیق کرتا ہے کہ یہ مواد مصنوعی ذہانت کے ذریعے تیار کیا گیا ہے۔

بصری معائنے (Visual examination) سے یہ بھی واضح ہوتا ہے کہ علامہ ناصر عباس کے لبوں کی جنبش اور چہرے کے تاثرات آواز کے ساتھ مطابقت نہیں رکھتے۔ آواز اور ویڈیو کے درمیان یہ تضاد اس بات کی ایک اور مضبوط علامت ہے کہ اس ویڈیو میں ردوبدل (Manipulation) کی گئی ہے۔

فیصلہ: سوشل میڈیا پر گردش کرنے والا یہ کلپ مصنوعی ذہانت (AI) کے ذریعے تیار کیا گیا ہے۔ علامہ راجہ ناصر عباس نے پاکستان کی فضائی حدود کے بارے میں یا ویڈیو میں منسوب کردہ دیگر دعووں سے متعلق کوئی بیان نہیں دیا۔

ہمیں X (ٹوئٹر) GeoFactCheck@ اور انسٹا گرام geo_factcheck@ پر فالو کریں۔ اگر آپ کو کسی بھی قسم کی غلطی کا پتہ چلے تو [email protected] پر ہم سے رابطہ کریں۔

Source link