[ad_1]
بنگلادیش کے بعد عراق نے بھی جے ایف 17 تھنڈر لڑاکا طیاروں کی ممکنہ خریداری میں دلچسپی کا اظہار کردیا۔
پاک فوج کے شعبہ تعلقات عامہ (آئی ایس پی آر) کے مطابق ائیر چیف مارشل ظہیر احمد بابر سدھو عراق کے دورے پر ہیں، عراقی فضائیہ کے ہیڈکوارٹر آمد پر سربراہ پاک فضائیہ کا تاریخی اور شاندار استقبال کیا گیا اور عراقی فضائیہ کے چاق و چوبند دستے نے گارڈ آف آنر پیش کیا۔
آئی ایس پی آر نے بتایاکہ ائیر چیف مارشل ظہیر احمد بابر سدھو نے کمانڈرعراقی فضائیہ لیفٹیننٹ جنرل اسٹاف پائلٹ مہند غالب محمد راضی الاسدی سے ملاقات کی جس میں دوطرفہ عسکری تعاون اور پیشہ ورانہ دلچسپی کے اُمور پر تبادلہ خیال کیا گیا۔
آئی ایس پی آر کا کہنا ہے کہ مشترکہ تربیت، صلاحیت میں اضافے، ایوی ایشن انڈسٹری میں تعاون اور دونوں فضائی افواج کے مابین عملی ہم آہنگی کے فروغ پر بات چیت کی گئی۔
ائیرچیف نے پاکستان اورعراق کے درمیان گہرے مذہبی،ثقافتی اورتاریخی روابط کو اُجاگر کیا اور دونوں برادر ممالک اور ان کی مسلح افواج کے درمیان دیرپا تعلقات کی بنیاد قرار دیا۔
سربراہ پاک فضائیہ نے تربیت اورمشترکہ صلاحیتوں میں اضافہ کےشعبوں میں عراقی فضائیہ کی مکمل معاونت کیلئے پاک فضائیہ کے غیر متزلزل عزم کا اعادہ کیا۔ ملاقات میں باہمی آپریشنل ہم آہنگی اورمستحکم عملی اشتراک کو فروغ دینے کیلئے مشترکہ مشقوں اور تربیتی پروگرامز کے انعقاد پر اتفاق کیا گیا۔
عراقی کمانڈر نےپاک فضائیہ کے پائلٹس کے ایکسچینج پوسٹنگ پروگرام میں گہری دلچسپی ظاہر کی اور جے ایف-17 تھنڈر لڑاکا طیاروں کی ممکنہ خریداری میں دلچسپی کا اظہار کیا جبکہ انہوں نے سپرمشاق تربیتی طیاروں کی شمولیت اورجامع دیکھ بھال و لائف سائیکل سپورٹ میں بھی دلچسپی کا اظہار کیا۔
عراقی ائیرچیف نے خطے میں استحکام کے فروغ کیلئے پاکستان کے تعمیری کردار کو بھی سراہا جبکہ عراقی ائیرچیف نے باہمی تزویراتی دلچسپی کے شعبوں میں تعاون بڑھانے کی خواہش کا اظہار کیا۔
خیال رہے کہ گزشتہ دنوں بنگلادیش کے ائیر چیف نے پاک فضائیہ کے سربراہ سے ملاقات کی تھی اور جے ایف 17 طیاروں کی ممکنہ خریداری پر بات چیت کی تھی۔
[ad_2]
Source link
Leave a Reply