چین میں ایک خاتون نے بہترین ملازمت کو چھوڑ کر غیر آباد جزیرے میں رہائش اختیار کرلی۔
بیجنگ کی ایک بڑی کمپنی میں سنیئر منیجر کے طور پر کام کرنے والی یو لی نے ایسٹ چائنا (sea) میں واقع ایک جزیرے میں کام کرنا شروع کر دیا ہے۔
اس جزیرے میں کام کرنے پر انہیں ماہانہ محض 3 ہزار یوآن ملتے ہیں۔
خاتون نے سوشل میڈیا پوسٹس میں اپنی نئی ملازمت کے بارے میں بتایا۔
وہ ڈونگ زائی نامی غیر آباد جزیرے میں واقع فش فیڈنگ بیس میں کوالٹی انسپکٹر کے طور پر کام کر رہی ہیں۔
اس جزیرے کے اردگرد بھی کئی غیر آباد جزیرے موجود ہیں اور وہاں سے قریبی آبادی 40 کلومیٹر کے فاصلے پر واقع ہے۔
یو لی کو مچھلیوں کو غذا فراہم کرنے والے آلات کا جائزہ لینا ہوتا ہے، پانی کے درجہ حرارت اور سمندری لہروں کی رفتار کو ریکارڈ کرنا ہوتا ہے جبکہ مچھلیوں کی نشوونما کی مانیٹرنگ بھی کرنا ہوتی ہے۔
دسمبر 2025 سے وہ اس جزیرے میں کام کر رہی ہیں اور اس سے قبل بیجنگ کی ایک بڑی کمپنی میں سنیئر منیجر تھیں جہاں انہوں نے 2 دہائیوں تک کام کیا۔
یو لی نے بتایا کہ انہوں نے یہ بہترین ملازمت کام کے دباؤ کی وجہ سے چھوڑی۔
انہوں نے مزید بتایا کہ ‘ہر سال 300 دن میں بزنس ٹورز پر ہوتی تھی، بیجنگ میں قیام کے دوران روزانہ 4 گھنٹے آفس اور گھر کے درمیان آنے جانے میں لگ جاتے تھے، ایک موقع پر تو جسمانی اور ذہنی صحت بہت زیادہ متاثر ہوئی تھی’۔
ان کا کہنا تھا کہ ‘میں نے خود سے پوچھا کہ کیا یہ وہ زندگی ہے جو میں چاہتی ہوں؟’
بعد ازاں صوبہ Zhejiang میں انہوں نے جزیرے پر ملازمت کا اشتہار دیکھا اور اس کے لیے اپلائی کر دیا کیونکہ وہ شہر کی مصروف زندگی سے اکتا گئی تھیں۔
انہوں نے کہا کہ ‘میں اپنا زیادہ تر وقت مطالعہ کرتے، سورج کو غروب ہوتے دیکھنے اور سمندر کے کنارے گزارنا چاہتی تھی’۔
انہوں نے اعتراف کیا کہ ایک ماہ تک غیر آباد جزیرے میں تنہا رہنے کے بعد وہاں کے حالات مشکل محسوس ہونے لگے تھے۔
ایک موقع پر تو طوفانی ہوائیں چلنے کے بعد وہ کھانا پکانے کے لیے آگ بھی نہیں جلا سکی تھیں جبکہ جزیرے میں چوہوں کی بھرمار ہے۔
مگر وہ وہاں کی زندگی سے لطف اندوز ہو رہی ہیں کیونکہ انہیں کافی وقت اپنے پسندیدہ مشاغل کے لیے مل جاتا ہے۔
Leave a Reply