وزیر دفاع خواجہ آصف کا کہنا ہےکہ دنیا کےکئی ممالک پاکستان کے لڑاکا طیاروں اور دیگر دفاعی ٹیکنالوجی کو حاصل کرنےکے خواہشمند ہیں۔
اعلامیے کے مطابق وزیر دفاع خواجہ آصف سعودی حکومت کی دعوت پر ورلڈ ڈیفنس شو میں شرکت کے لیے ریاض پہنچے۔ ریاض آمد پر سعودی حکام اور سعودی عرب میں پاکستان کے سفیر احمد فاروق نے استقبال کیا۔
اعلامیے کے مطابق وزیر دفاع خواجہ آصف کی سعودی وزیر دفاع شہزادہ خالد بن سلمان بن عبدالعزیز سے بھی ملاقات ہوئی، خواجہ آصف نے ورلڈ ڈیفنس شو کے شاندار انعقاد پر سعودی قیادت کو مبارکباد دی، وزیردفاع نےعالمی سطح کے دفاعی ایونٹ کو خطے میں دفاعی تعاون کے فروغ کے لیے اہم سنگ میل قرار دیا۔
عالمی دفاعی نمائش میں گفتگو کرتے ہوئے خواجہ آصف کا کہنا تھا کہ پاکستان دفاعی اعتبار سے پوری دنیا میں اپنا منفرد مقام بناچکا ہے، دنیا کےکئی ممالک پاکستان کے لڑاکا طیاروں اور دیگر دفاعی ٹیکنالوجی کو حاصل کرنےکےخواہشمند ہیں۔
خواجہ آصف کا کہنا تھا کہ پاکستانی معیشت میں ہماری دفاعی صلاحیت کا بہت بڑا کردار ہوگا۔
خیال رہےکہ دفاعی نمائش میں پاکستان سمیت 80 ممالک شریک ہیں، پاکستان کی جانب سے گلوبل انڈسٹریل اینڈ ڈیفنس سلوشن، ہیوی انڈسٹریز ٹیکسلا اور پاکستان آرڈیننس فیکٹری سمیت کئی ادارے نمائش میں شرکت کر رہے ہیں۔
بھارت کے خلاف معرکہ حق میں پاکستان کی دفاعی لائن کو مضبوط بنانے والے میزائل فتح 2 سمیت دیگر میزائلوں اور دفاعی سازوسامان بھی نمائش کا حصہ ہیں۔
Leave a Reply