چنئی: آئی سی سی مینز ٹی ٹوئنٹی ورلڈکپ میں کینیڈین بیٹر یووراج سامرا نے سنچری اسکور کرکے پاکستانی کرکٹر احمد شہزاد کا 12 سال پرانا ورلڈ ریکارڈ توڑ دیا۔
منگل کو آئی سی سی مینز ٹی ٹوئنٹی ورلڈکپ میں کینیڈا اور نیوزی لینڈ کی ٹیمیں مدمقابل تھیں۔
کینیڈا نے پہلے بیٹنگ کرتے ہوئے اوپنر یووراج کی شاندار سنچری کی بدولت مقررہ 20 اوورز میں 4 وکٹوں میں 173رنز اسکور کیے۔
یووراج سامرا آئی سی سی مینز ٹی ٹوئنٹی ورلڈ کپ میں سنچری بنانے والے کم عمر ترین کھلاڑی بن گئے۔انہوں نے نیوزی لینڈکے خلاف 65 گیندوں پر 110 رنز کی اننگز کھیلی۔
کینیڈین بیٹر یووراج نے 19 سال اور 141 دن کی عمر میں سنچری بنا کر پاکستان کے احمد شہزاد کا ورلڈ ریکارڈ توڑا ۔
احمد شہزاد نے 2014 کے ٹی ٹوئنٹی ورلڈکپ میں بنگلادیش کے خلاف 22 سال اور 127 دن کی عمر میں سنچری اسکور کی تھی۔
علاوہ ازیں یووراج مینز ٹی ٹوئنٹی ورلڈ کپ میں ایسوسی ایٹ نیشن کی جانب سے سنچری بنانے والے پہلے کھلاڑی بھی بن گئے۔
نیوزی لینڈ نے کینیڈا کا 174 رنز کا ہدف با آسانی 16 ویں اوور میں 2 وکٹوں کے نقصان پر پورا کرلیا اور گروپ ڈی سے سپر 8 مرحلے کیلئے کوالیفائی کرلیا۔
Leave a Reply