امیر جماعت اسلامی حافظ نعیم الرحمان نے آج اسلام آباد میں جمیعت علمائے اسلام (جے یو آئی) کے سربراہ مولانا فضل الرحمان سے ان کی رہائش گاہ پر ملاقات کی۔
ملاقات کے بعد مولانا فضل الرحمان کے ہمراہ میڈیا سے گفتگو کرتے ہوئے حافظ نعیم نے کہا کہ مولانا فضل الرحمان سے ملکی اور بین الاقوامی صورتحال پر تبادلہ خیال کیا۔
امیر جماعت اسلامی نے کہا کہ غزہ امن بورڈ کے حوالے سے بھی مولانا فضل الرحمان سے بات چیت ہوئی، مولانا فضل الرحمان سے ہماری مشاورت کا سلسلہ جاری رہے گا۔
مولانا فضل الرحمان نے میڈیا سے بات کرتے ہوئے کہا کہ 19فروری کو غزہ امن بورڈ کا اجلاس ہونے جارہا ہے، 70ہزار سے زیادہ فلسطینیوں کا خون بہایا گیا ہے، فلسطینیوں کے ساتھ عالمی قوتیں مذاق کر رہی ہیں۔
مولانا فضل الرحمان کا مزید کہنا تھا کہ عیدالفطر کے بعد ملک گیر عوامی تحریک چلائیں گے، ہم چاروں صوبوں میں جائیں گے، جے یوآئی نے 12 تاریخ کو مردان میں ملین مارچ کا اعلان کیا ہے۔
انہوں نے مزید کہا کہ افغانستان سے بھی کہتے ہیں کہ وہ پاکستان کے ساتھ بہتر تعلقات بنائے۔
Leave a Reply