بنگلادیش کو ورلڈکپ سے باہر کرنے کا معاملہ، بھارتی صحافی بی سی سی آئی اور آئی سی سی پر برس پڑی

ورلڈکپ کا موجودہ معاملہ نہایت ہی بھونڈے انداز میں ہینڈل کیا گیا، اگر آئی سی سی کی جگہ کوئی سنجیدہ اسپورٹس باڈی ہوتی تو اسے اندازہ ہوتا کہ معاملہ مس ہینڈل ہوا ہے: بھارتی صحافی۔ فوٹو فائل

آئی سی سی ٹی ٹوئنٹی ورلڈ کپ میں بنگلا دیش کے باہر ہو جانے اور پاکستان کے بھارت کے خلاف میچ کے بائیکاٹ کے ارادے پر بھارتی صحافی شاردا اگرا نے بھارتی کرکٹ بورڈ اور آئی سی سی پر کڑی تنقید کی ہے۔

شاردا اگرا کا کہنا ہے کہ آئی سی سی کا دفتر بی سی سی آئی کا دبئی آفس بن چکا ہے لہٰذا اب آئی سی سی وہی کرتا ہے جو بی سی سی آئی چاہتا ہے، آئی سی سی کے ایگزیکٹو بورڈ اجلاس میں بھی یہی نظر آیا۔

بھارتی صحافی نے کہا کہ ورلڈ کپ کا موجودہ معاملہ نہایت ہی بھونڈے انداز میں ہینڈل کیا گیا اور موجودہ حالات میں آئی سی سی کی اپنی ساکھ کافی متاثر ہوچکی ہے، یہ سارا معاملہ اس وقت ہوا جب ایک بنگلا دیشی کھلاڑی کو آئی پی ایل سے نکالا گیا اور پاکستان کا اس معاملہ میں پڑنا ماضی میں بھارت کے رویے کا جواب ہو سکتا ہے۔

شاردا اگرا کا کہنا تھا کہ مستفیض الرحمان کو آئی پی ایل سے نکالنا سیاسی فیصلہ تھا اور بی سی سی آئی بھارت کے حکمرانوں سے جڑی ہوئی ہے، انہوں نے سوال اٹھایا کہ بھارتی ٹیم کو کس نے پاکستانی پلیئرز سے ہاتھ ملانے سے روکا یہ آج تک کوئی نہیں جانتا۔

بھارتی صحافی نے کہا کہ پاکستان کے ورلڈ کپ سے دستبردار ہونے پر آئی سی سی کو شدید نقصان ہوگا، پاکستان کی اہمیت اس لیے ہے کہ پاک بھارت میچ سے بہت زیادہ پیسہ بنتا ہے۔

ان کا مزید کہنا تھا کہ ورلڈ کپ کے موجودہ بحران کی وجہ بھارت کا آئی سی سی اور دیگر بورڈز پر اثر انداز ہونا بھی ہے، جب بنگلا دیش کو بھارت جانے سے مسئلہ ہوا تو آئی سی سی کو ٹورنامنٹ کے قوانین یاد آگئے۔

شاردا اگرا نے کہا کہ آج جو حالات ہیں اس کی وجہ انٹرنیشنل کرکٹ میں بھارت کی مالی قوت ہے، جے شاہ نے آئی سی سی کا چیئرمین بننے کے بعد ایک بھارتی کو ہی سی سی او لگایا، اگر ان کی جگہ کسی اور ملک کا سی ای او ہوتا تو وہ موجودہ صورتحال کو مختلف انداز میں ہینڈل کرتا۔

انہوں نے کہا کہ کرکٹ ایک مشترکہ ثقافت کا موقع ہونے کے بجائے سیاسی لڑائی کا مرکز بن چکا ہے جس میں بھارت کرکٹ سے پڑوسیوں کو جواب دے رہا ہے، بنگلا دیش کو بھارت کی طرح سہولت اس لیے نہیں ملی کیونکہ اس کا اثر و رسوخ نہیں ہے۔

اپنی بات کو جاری رکھتے بھارتی صحافی نے کہا کہ آئی سی سی اب ایک سنجیدہ اسپورٹس باڈی نہیں رہی، اگر آئی سی سی کی جگہ کوئی سنجیدہ اسپورٹس باڈی ہوتی تو اسے اندازہ ہوتا کہ معاملہ مس ہینڈل ہوا ہے۔

اپنے خیالات کا اظہار کرتے ہوئے شاردا اگرا نے کہا کہ اس تمام صورتحال سے یوں لگتا ہے کہ بات ایک ایونٹ کو اسپورٹس ایونٹ کے طور پر کرانے کے لیے نہیں ہو رہی، یہاں آئی سی سی نے کروڑوں افراد کی نمائندہ ٹیم کو ٹورنامنٹ سے باہر کر دیا۔

ان کا کہنا ہے کہ انگلینڈ اور آسٹریلیا کے کرکٹ بورڈز بی سی سی آئی کے سہولت کار بننے ہوئے ہیں، اگر بنگلا دیش کا مطالبہ تسلیم کرلیا جاتا تو بی سی سی آئی کی انا کو ٹھیس پہنچتی۔