اداکار ابھیشیک بچن نے بلآخر اپنے اور اہلیہ اداکارہ ایشوریا رائے کے بارے میں پھیلی ہوئی من گھڑت طلاق کی افواہوں پر دو ٹوک جواب دے دیا۔
بھارتی میڈیا کے مطابق ایک انٹرویو میں ابھیشیک بچن نے کہا کہ اگر آپ سلیبریٹی ہیں تو لوگ آپ کی ہر بات پر قیاس آرائیاں کریں گے، ہم سے متعلق جو بھی فضول چیزیں لکھی جاتی ہیں، وہ جھوٹی، بے بنیاد، غلط اور بدنیتی سے بھرپور ہوتی ہیں۔
انہوں نے کہا کہ میڈیا ہماری شادی سے پہلے بھی یہی کر رہا تھا، پہلے طے کر رہے تھے کہ ہم کب شادی کریں گے اور شادی کے بعد طے کررہے ہیں کہ ہم کب طلاق لیں گے، یہ سب بکواس ہے۔
ابھیشیک نے مزید کہا کہ ایشوریا میری سچائی جانتی ہیں، میں ایشوریا کی سچائی جانتا ہوں، ہمارا خوش و خرم خاندان ہے، یہی سب سے اہم ہے، باقی سب بے معنی باتیں ہیں۔
اس سوال پر کہ کیا اس قسم کی افواہیں ذہنی دباؤ کا باعث بنتی ہیں، ابھیشیک نے جواب دیا کہ اگر اس میں ذرا سا بھی سچ ہوتا تو شاید مجھ پر اس کا اثر ہوتا لیکن چونکہ یہ سب جھوٹ ہے، اس لیے کوئی فرق نہیں پڑتا۔
بیٹی آرادھیا کے ان جھوٹی خبروں سے متاثر ہونے کے سوال پر اداکار نے بتایا کہ آرادھیا کے پاس فون نہیں ہے اور ایشوریا نے اسے سکھایا ہے کہ انٹرنیٹ پر لکھی ہر بات پر یقین نہیں کرنا چاہیے۔
واضح رہے کہ بھارتی میڈیا کے مطابق سوشل میڈیا پر طویل عرصے سے یہ چہ مگوئیاں جاری تھیں کہ ابھیشیک اور ایشوریا کے درمیان سب ٹھیک نہیں، حالانکہ جوڑا ہمیشہ خاندان کے ساتھ خوش گوار انداز میں نظر آتا رہا ہے۔
ابھیشک اور ایشوریا رائے 2007 میں رشتۂ ازدواج میں منسلک ہوئے تھے اور 2011 میں ان کے یہاں آرادھیا کی پیدائش ہوئی تھی۔
ابھیشیک بچن جلد شاہ رخ خان، دیپیکا پڈوکون، رانی مکھرجی اور سہانا خان کے ساتھ فلم ’کنگ‘ میں نظر آئیں گے۔
Leave a Reply