اسلام آباد: وفاقی وزیر اطلاعات عطا اللّٰہ تارڑ نے ملک کی بڑھتی آبادی پر تشویش کا اظہار کرتے ہوئے کہا ہےکہ ہر سال ہماری آبادی میں نیوزی لینڈ کی آبادی کے برابر اضافہ ہو رہا ہے۔
اسلام آباد میں پاکستان پاپولیشن سمٹ 2025 کی تقریب سے خطاب کرتے ہوئے عطا تارڑ نے کہا کہ بڑھتی آبادی کی وجہ سے صحت، تعلیم اور دیگر شعبوں میں چیلنجز سامنے آرہے ہیں، بڑھتی آبادی کے چیلنج سے نمٹنے کے لیے آگاہی پھیلانا ضروری ہے، آگاہی کے فقدان سے آبادی کا چیلنج مزید سنگین ہوتا جارہا ہے۔
انہوں نے کہا کہ آبادی کے چیلنج سے نمٹنے کے لیے معاشرے کے ہر طبقے کو اپنا کردار ادا کرنا ہو گا، آبادی میں بڑی تیزی سے اضافہ تشویشناک ہے، بڑھتی آبادی سے وسائل پر دباؤ بڑھ رہا ہے۔
وزیر اطلاعات کا کہنا تھا کہ زیادہ بچوں کی پیدائش زچہ و بچہ کی صحت کے لیے بھی نقصان دہ ہے، بڑھتی آبادی ترقی کی رفتار سست کرسکتی ہے لہٰذا ترقی برقرار رکھنے کے لیے متوازن آبادی ضروری ہے۔
عطا تارڑ نے مزید کہا کہ ہر سال ہماری آبادی میں نیوزی لینڈ کی آبادی کے برابر اضافہ ہو رہا ہے، زندگی کا بنیادی حق آبادی کے مسئلے سے منسلک ہے، صحت کے پہلوؤں اور زندگی کے حق کے حوالے سے بحیثیت قانون ساز ہمیں اپنا کردار ادا کرنا ہوگا۔
ان کا کہنا تھا کہ بڑھتی آبادی معیشت اور بنیادی سہولتوں پر بوجھ ڈال رہی ہے، ہمارے ریجن میں ورکنگ ویمن کی شرح دیگر خطوں کے مقابلے میں کم ہے، یہ معاشرتی مسئلہ ہے اسے آگاہی کے ذریعے حل کرنا ہوگا، آبادی کے مسئلے سے نمٹنے کے لیے ورکنگ گروپ تشکیل دینا ضروری ہے۔
Leave a Reply