پی ٹی آئی کے پی قیادت کا امیدواروں کی فہرست عمران خان سے چھپانے اور ردوبدل کا الزام

فوٹو: فائل

اسلام آباد: خیبرپختونخوا (کے پی) کے سینیٹ الیکشن میں امیدواروں کی فہرست بانی پی ٹی آئی عمران خان سے چھپانےکا الزام سامنے آگیا۔

ذرائع کے مطابق خیبرپختونخوا میں پارٹی قیادت پر سینیٹ امیدواروں کی فہرست میں ردوبدل کا بھی الزام عائد کیا جا رہا ہے۔

ذرائع کا کہنا ہے کہ کے پی قیادت نے 15 جولائی کو سینیٹ امیدواروں کی فہرست بانی پی ٹی آئی کو بھجوائی لیکن بیرسٹرگوہر، بیرسٹر سیف اورپارٹی قیادت نےکے پی قیادت کی فہرست بانی تک نہ پہنچائی۔

ذرائع کے مطابق پی ٹی آئی کے پی نوٹیفکیشن کے مطابق 7 ناموں کی فہرست بانی پی ٹی آئی کو بھجوائی گئی۔ جنرل سیکرٹری کے پی علی اصغر خان نے فہرست مرکزی قیادت تک پہنچائی تھی۔

پارٹی ذرائع کے مطابق کے پی قیادت کی جانب سے دی گئی فہرست میں مرزا آفریدی کا نام شامل نہیں تھا۔7 ناموں میں مراد سعید، عرفان سلیم ، فیصل جاوید اور خرم ذیشان شامل تھے۔

صوبائی تنظیم کی جانب سے دی گئی فہرست میں اظہرمشوانی کا نام شامل کیا گیا تھا۔ صوبائی قیادت کی فہرست میں ٹیکنوکریٹ سیٹ پر نور الحق قادری اور اعظم سواتی کا نام شامل تھا۔

پی ٹی آئی ذرائع کے مطابق پارٹی تنظیم کی فہرست کی جگہ نئے ناموں پر بیرسٹر سیف نے مشاورت کی۔

جنرل سیکرٹری کے پی علی اصغر خان کا کہنا ہےکہ صوبائی تنظیم کی جانب سے ایک فہرست مرتب کی گئی تھی، ہمیں توقع تھی ہماری فہرست بانی پی ٹی آئی تک پہنچائی جائےگی، ہماری فہرست نہ پہنچی لیکن تنظیم کی خواہش تھی کہ پارلیمانی بورڈ بنائیں، بطور صوبائی قیادت ہم نے ضلعی و صوبائی تنظیم سے مشاورت کے بعد چند نام دیے تھے۔

دوسری جانب چیئرمین پی ٹی آئی بیرسٹر گوہر علی کا کہنا ہےکہ میں نے نہ ہی نام تبدیل کیے نہ ہی اس فہرست کو چھپایا، جب کہ بیرسٹر سیف سے موقف لینے کے لیے رابطہ کیا گیا تاہم جواب نہیں دیا گیا۔

خیال رہے کہ خیبر پختونخوا اسمبلی میں سینیٹ الیکشن کے لیے پولنگ کا وقت ختم ہوگیا۔

خیبر پختونخوا میں سینیٹ کی 11 نشستوں پر ووٹ ڈالےگئے، پی ٹی آئی کے ناراض امیدوار خرم ذیشان نے انتخاب میں حصہ لیا، چار دیگر ناراض امیدوار بیٹھ گئے۔

جنرل نشست پر ایک سینیٹر منتخب کرنے کے لیے 19 ووٹ درکار تھے، اسمبلی میں حکومتی اراکین کی تعداد 92 اور اپوزیشن کی 53 ہے۔