اسلام آباد: وفاقی وزیر منصوبہ بندی احسن اقبال نے آئندہ 5 سال میں 60 ارب ڈالر برآمدات کا ہدف حاصل کرنے کےلیے بزنس پلان تیار کرنے کی ہدایت کردی۔
تفصیلات کے مطابق احسن اقبال کی زیر صدارت اڑان پاکستان پروگرام کے تحت برآمدات میں اضافے کے لیے حکمت عملی کا جائزہ لینے کے حوالے سے اجلاس ہوا جس فائیو ای فریم ورک کے پہلے ای ایکسپورٹ سے متعلق جائزہ لیا گیا۔
اجلاس میں وفاقی وزیر منصوبہ بندی نے آئندہ 5 سال میں 60 ارب ڈالر برآمدات کا ہدف حاصل کرنے کےلیے بزنس پلان تیار کرنے کی ہدایت کی۔
احسن اقبال نے وزارت منصوبہ بندی کے حکام کو ہدایت کی کہ مقامی پیداوار عالمی مارکیٹ کے رحجان کا جائزہ لیاجائے اور ایک جامع ڈیٹا مرتب کیا جائے کیونکہ جب تک ہمارے پاس درست اور واضح ڈیٹا نہیں ہوگا ہم اپنے وسائل کو ضائع کرتے رہیں گے۔
اس حوالے سے اجلاس کو بتایا گیا کہ وزارت منصوبہ بندی 8 اسٹریٹیجک کلسٹر پرکام کررہی ہےجن کی بنیاد پر پاکستان کی مستقبل میں برآمدی گروتھ کا دارومدار ہوگا۔
رپورٹ کے مطابق ان 8 اسٹریٹیجک کلسٹر میں زراعت اور زرعی مصنوعات کی برآمدات، صنعت اور مینوفیکچرنگ بشمول ٹیکسٹائل، انجینئرنگ اور فارما، خدمات کا شعبہ ، آئی ٹی و ڈیجیٹل سروسز ، معدنیات اور کان کنی، افرادی قوت کی برآمداور اوورسیز ملازمت، بلیو اکانومی کریٹو انڈسٹری جن میں میڈیا، آرٹس اور ثقافت شامل ہیں۔
رپورٹ کے مطابق ہر کلسٹرپر متعلقہ وزارت ہر پروڈکٹ کےلیے جامع بزنس پلان تیار کرے گی۔
Leave a Reply