کیا آپ نے کبھی خواب دیکھا ہے کہ آپ کا اپنا نجی جزیرہ ہو جہاں آپ چھٹیاں گزارنے جا سکیں اور سمندری لہروں کی سکون پہنچانے والی آواز سن سکیںَ
اگر ہاں تو اب اس کی تعبیر ممکن ہے۔
جی ہاں واقعی وزٹ سویڈن نامی سویڈش ادارے کی جانب سے 5 نجی جزیروں کی ملکیت غیر ملکی سیاحوں کے حوالے کرنے کا فیصلہ کیا گیا ہے۔
یہ ملکیت ایک سال تک ان خوش قسمت افراد کے پاس رہے گی اور پورا جریزہ ان کے پاس ہوگا۔
پورے 365 دن تک وہ افراد ان جزائر کے مالک ہوں گے اور آئی لینڈ Custodian کہلائیں گے۔
سویڈن میں 2 لاکھ 67 ہزار سے زائد جزائر موجود ہیں جن میں سے 5 خوبصورت اور بے آباد جزائر کی ملکیت لوگوں کے حوالے کی جائے گی۔
مگر اس کے لیے چند شرائط کو پورا کرنا ہوگا۔
وزٹ سویڈ کی چیف ایگزیکٹو سوزان اینڈرسن نے بتایا کہ دنیا کے کسی بھی ملک کے مقابلے میں سویڈن میں جزائر کی تعداد سب سے زیادہ ہے اور ہم چاہتے ہیں کہ عام لوگ یہاں آکر محسوس کرسکیں کہ کسی جزیرے کی ملکیت ہونے سے کیسا محسوس ہوتا ہے۔
وزٹ سویڈن نے اس پروگرام کے لیے سویڈش نیشنل پراپرٹی بورڈ سے شراکت داری کی ہے جو کہ حکومتی ثقافتی جائیدادوں کی دیکھ بھال کرنے والا ادارہ ہے۔
یہ تمام جزائر آبادیوں کے قریب ہیں تاکہ خوش قسمت افراد اپنی تمام ضروریات آسانی سے پوری کرسکیں۔
وزٹ سویڈن کے مطابق 5 جزائر کو استعمال کرنے کا حق کامیاب افراد کو دیا جائے گا جبکہ انہیں سویڈن کے مختلف خطوں کی سیر بھی کرائی جائے گی۔
ان افراد کو ایک معاہدے پر دستخط کرنا ہوں گے جس میں وہ جزائر کی ذمہ داری قبول کریں گے۔
اس پروگرام کے لیے درخواستیں ویب سائٹ پر 17 اپریل تک جمع کرائی جاسکتی ہیں۔
مزید تفصیلات کے لیے آپ براہ راست سویڈن ویب سائٹ کا وزٹ کرسکتے ہیں۔
Leave a Reply