کراچی میں ہیوی ٹریفک کے حادثات نہ تھم سکے، 2 مختلف حادثات کے نتیجے میں 2 افراد جان سے ہاتھ دھو بیٹھے۔
پہلا واقعہ کراچی کے علاقے لیاقت آباد 10 نمبر کےقریب پیش آیا جہاں ایک تیز رفتار ٹرک نے موٹر سائیکل سوار کو روند ڈالا جس کے نتیجے میں ایک شخص جان کی بازی ہار گیا جس کی شناخت 55 سالہ صابر کے نام سے ہوئی۔
واقعے کے بعد مشتعل افراد نے پتھراؤ کرکے ٹرک کے شیشے توڑ دیے، ٹرک کو بھی آگ لگادی، شہریوں نے قریب سےگزرنے والی ہیوی ٹریک پر بھی پتھراؤ کرکے شیشے توڑ دیے۔
پولیس نے بتایا کہ ٹرک ڈرائیور موقع سے فرار ہوگیا جس کی گرفتاری کےلیے کوششیں کی جارہی ہیں۔
دوسری جانب ملیر ماڈل کالونی کے قریب بھی ٹرک ڈرائیور نے موٹر سائیکل سواروں کو ٹکر ماردی جس کے نتیجے میں ایک شخص جاں بحق ہوگیا۔ واقعے میں 2 افراد زخمی بھی ہوئے جن کی حالت تشویش ناک بتائی جارہی ہے۔
ملیر ماڈل کالونی میں بھی مشتعل افراد نے ٹرک کے شیشے توڑ دیے، ڈرائیور کو تشدد کا نشانہ بنایا جبکہ پولیس نے ٹرک ڈرائیور کو حراست میں لےکر تھانے منتقل کردیا۔
Leave a Reply