یوٹیوب کی جانب سے مسلسل کوشش کی جا رہی ہے کہ اس ویڈیو شیئرنگ سروس کو مفت استعمال کرنے والے افراد کو پریمیئم پلان پر منتقل ہو جائیں۔
یہی وجہ ہے کہ کمپنی کی جانب سے یوٹیوب کے ایک مقبول فیچر تک مفت صارفین کی رسائی ختم کرنے کا فیصلہ کیا گیا ہے۔
ایک رپورٹ کے مطابق یوٹیوب کی جانب سے مقبول موبائل براؤزر بیک گراؤنڈ پلے بیک فیچر تک مفت صارفین کی رسائی ختم کرنے کے لیے اقدامات کیے جا رہے ہیں۔
کافی عرصے سے یوٹیوب صارفین اس فیچر کو استعمال کررہے ہیں جو گوگل کروم میں صرف پریمیئم صارفین کو دستیاب ہے۔
مفت صارفین کی جانب سے دیگر موبائل براؤزر جیسے مائیکرو سافٹ ایج، بریو یا سام سنگ انٹرنیٹ کو استعمال کیا جاتا ہے تاکہ پلے بیک میں ویڈیو چلا سکیں۔
مگر اب متعدد صارفین کی جانب سے رپورٹ کیا گیا ہے کہ اب یہ فیچر ان کے لیے کام نہیں کر رہا اور گوگل نے ایک بیان میں بتایا کہ اس حوالے سے اقدامات کیے جا رہے ہیں۔
کچھ صارفین ابھی بھی اس فیچر کو استعمال کر رہے ہیں مگر بتدریج ان کے لیے بھی اسے استعمال کرنا ممکن نہیں ہوگا۔
صارفین کی جانب سے تنقید کیے جانے پر گوگل نے ایک بیان جاری کرتے ہوئے بتایا کہ موبائل براؤزرز پر اس فیچر کے استعمال کے خلاف کریک ڈاؤن کیا جا رہا ہے۔
کمپنی کے مطابق یہ فیچر یوٹیوب پریمیئم صارفین کے لیے ڈیزائن کیا گیا مگر کچھ مفت صارفین اس تک موبائل براؤزرز کے ذریعے رسائی حاصل کر رہے ہیں۔ جس کی روک تھام کے لیے ہم اقدامات کر رہے ہیں۔
Leave a Reply