لاہور: پاکستان سپر لیگ ( پی ایس ایل) کے 11ویں ایڈیشن میں کھلاڑیوں کی کیٹیگریز کا اعلان کردیا گیا۔
جیو نیوز کے مطابق رواں سال شروع ہونے والے پی ایس ایل میں 89 مقامی کھلاڑی 5 مختلف کیٹیگریز میں تقسیم کیے گئے ہیں۔
پلاٹینم کیٹیگری میں 16 کھلاڑیوں کو شامل کیا گیا ہے جن میں سلمان آغا، حسن علی، محمد نواز اور ابرار احمد کو ڈائمنڈ سے پلاٹینم کیٹیگری میں ترقی ملی ہے جب کہ صاحبزادہ فرحان گولڈ سے پلاٹینم کیٹیگری میں پہنچ گئے ہیں۔
بابراعظم، شاہین آفریدی، محمد رضوان، فخر زمان، صائم ایوب، نسیم شاہ، حارث رؤف اور شاداب خان پلاٹینم کیٹیگری میں برقرار ہیں۔
پی ایس ایل کے اس ایڈیشن میں 11 کھلاڑی ڈائمنڈ کیٹیگری میں شامل کیے گئے ہیں جس کے مطابق محمد وسیم جونیئر، سفیان مقیم اور سلمان مرزا گولڈ سے ڈائمنڈ میں ترقی پا گئے ہیں۔
گولڈ کیٹیگری میں 32 کھلاڑی شامل ہوئے ہیں جب کہ سلور اور ایمرجنگ کیٹیگری میں 30 کھلاڑی ہوں گے۔
پی ایس ایل کے آکشن سے پہلے ہر فرنچائز کل 4 کھلاڑی اور فی کیٹیگری ایک کھلاڑی برقرار رکھ سکے گی۔
پاکستان سپر لیگ کے لیے غیر ملکی کھلاڑیوں کی رجسٹریشن کی تاریخ 3 فروری تک بڑھا دی گئی ہے جب کہ پی ایس ایل کا پہلا اور تاریخی پلیئرز آکشن 11 فروری کو ہوگا۔
Leave a Reply