اسلام آباد: امریکا اور پاکستان نے دوطرفہ سکیورٹی تعاون و بارڈر مینجمنٹ میں اشتراک بڑھانے پر اتفاق کرتے ہوئے بارڈر سکیورٹی،کوسٹل گارڈز اور دیگر اداروں کو جدید امریکی آلات سے لیس کرنے کا فیصلہ کیا ہے۔
ہفتے کو وزیرداخلہ محسن نقوی سے امریکی سفیر نیٹلی بیکر کی سربراہی میں اعلیٰ سطح وفد نے ملاقات کی جس میں پاک امریکا تعلقات اور مشترکہ مفادات کے شعبوں میں تعاون بڑھانے پر تفصیلی تبادلہ خیال کیا گیا۔
ملاقات میں دوطرفہ سکیورٹی تعاون و بارڈر مینجمنٹ کے ضمن میں اشتراک بڑھانے ، امریکی اداروں اینٹی ٹیررسٹ اسسٹنٹس پروگرام کے ساتھ جاری تعاون مضبوط بنانے پر اتفاق ہوا۔
ملاقات میں بیورو آف انٹرنیشنل نارکوٹکس اینڈ لاء انفورسمنٹ کے ساتھ جاری تعاون مضبوط بنانے پر بھی اتفاق کرتے ہوئے مستقبل میں ہر سطح پر پاک امریکا تعاون مضبوط بنانے کے لیے کوآرڈینیشن بہتر بنانے کا فیصلہ کیا گیا۔
ملاقات میں ایف آئی اے، فیڈرل کانسٹیبلری اور سائبر کرائم ایجنسی کے افسران کیلئے ٹریننگ پروگرامز پر گفتگو ہوئی جبکہ امریکا کے تعاون سے ایف آئی اے میں سینٹر فار ٹرانسفارمیشن کرائم اور اکیڈمی کے قیام کے امور پر بھی بات چیت ہوئی۔
ملاقات میں بارڈر سکیورٹی،کوسٹل گارڈز اور دیگر اداروں کو جدید امریکی آلات سے لیس کرنے کا بھی فیصلہ ہوا۔
اس موقع پر وزیر داخلہ محسن نقوی نے کہا کہ بیرون ملک جرائم میں ملوث افراد کی نشاندہی جدید سافٹ ویئر کے ذریعے کی جائے گی۔
Leave a Reply