پاکستان اور قطر نے توانائی، زراعت، انفارمیشن ٹیکنالوجی، سیاحت، دو طرفہ تجارت اور سرمایہ کاری کے تعاون کو بڑھانے کی اہمیت پر زور دیا ہے۔
وزیراعظم شہباز شریف سے پاکستان قطر مشترکہ وزارتی کمیشن کے اجلاس کی شریک صدارت کے لیے پاکستان کا دورے پر آئے ہوئے قطر کے وزیر تجارت و صنعت شیخ فیصل بن ثانی نے ملاقات کی۔
شہباز شریف نے پاک قطر تعلقات کی مثبت سمت پر اطمینان کا اظہار کرتے ہوئے پاکستان کے ایک اہم شراکت دار اور با اثر علاقائی ثالث کے طور پر قطر کے کردار کو سراہا۔
ملاقات میں وزیراعظم نے پاکستان کی سرمایہ کار دوست پالیسیوں پر روشنی ڈالی، اور وزیراعظم نے توانائی، زراعت، غذائی تحفظ، انفارمیشن ٹیکنالوجی، سیاحت اور بنیادی ڈھانچے کی ترقی کے مواقعوں سمیت دو طرفہ تجارت اور سرمایہ کاری کے تعاون کو بڑھانے کی اہمیت پر زور دیا۔
شہباز شریف نے قطری سرمایہ کاروں کو ایس آئی ایف سی فریم ورک کے تحت تعاون کی نئی راہیں تلاش کرنے کی دعوت دی۔
شیخ فیصل بن ثانی بن فیصل الثانی نے قطری قیادت کی جانب سے نیک خواہشات کا اظہار کیا اور قطری وزیر تجارت نے پاکستان کے ساتھ اقتصادی روابط کو مزید مستحکم کرنے کے لیے قطر کے عزم کا اعادہ کیا۔
وزیراعظم نے علاقائی اور عالمی مسائل پر قطر کی مسلسل حمایت پر پاکستان کی جانب سے تعریف کا اظہار کیا اور علاقائی اور کثیرالجہتی فورمز پر تعاون کو مضبوط بنانے کی پاکستان کی خواہش کا اعادہ کیا۔
دونوں رہنماؤں نے مشترکہ افہام و تفہیم کو ٹھوس نتائج میں تبدیل کرنے کے لیے قریبی روابط بحال رکھنے پر اتفاق کیا۔
Leave a Reply