مظفرآباد: نو منتخب وزیراعظم آزاد کشمیر راجہ فیصل ممتاز راٹھور نے اسپشل سیکرٹری اور سینیئر سیکرٹری کا عہدہ ختم کرنے کا اعلان کرتے ہوئے کہاکہ سیکرٹری صاحبان کے پاس صرف ایک گاڑی ہوگی۔
نو منتخب وزیراعظم آزاد کشمیر راجہ فیصل ممتاز راٹھور نے ایوان سے پہلے خطاب میں کہا کہ اللہ نے سیاسی ورکر کے کاندھوں پر بھاری ذمہ داری ڈال دی، یہ ذمہ داری صرف مجھ پر نہیں ان سب پر ہے جنہوں نے مجھے ووٹ دیا، ذوالفقار بھٹو، بے نظیر بھٹو نے میرے والد پر وزرات عظمیٰ کی ذمہ داری ڈالی۔ آج بلاول بھٹو نے مجھ پر اعتماد کیا اور ذمہ داری ڈالی۔
وزیراعظم آزاد کشمیر راجہ فیصل ممتاز راٹھور نے کہا کہ پہلی بار جانے والا وزیر اعظم آنے والے وزیراعظم کو خوش آمدید کہتا ہوا رخصت ہوا، ایکشن کمیٹی حقیقت ہے،جسے تسلیم کرنا ہوگا۔
ان کا کہنا تھا کہ عوام کے مسائل کو وسائل کے اندر رہ کر حل کرنا ہے،کچھ مسئلے حل ہوسکتے تھے،جس میں تاخیر ہوئی، بطور وزیراعظم عہد کرتا ہوں،میرے قلم سے تاخیر نہیں ہوگی۔
نو منتخب وزیراعظم آزاد کشمیر راجہ فیصل ممتاز راٹھور نے کہا کہ لوگ سمجھتے ہیں ہم مراعات یافتہ طبقہ ہیں لیکن ہم سیاست دان ایسےنہیں، والد نے ایک مکان بنایا، جسے میں نے الیکشن اخراجات کیلئے فروخت کیا۔میرے اثاثے جو آج ہیں وہ وزرات عظمیٰ کے بعد بھی دیکھ لیجئے گا۔
انہوں نے کہا کہ ہم نے پاکستان کے ساتھ اپنے رشتوں کو مضبوط کرنا ہے، 6،7 ماہ میں ڈیلیور کر گئے تو اگلی حکومت میں ایم ایل اے کی حیثیت سے کام کروں گا، ایکشن کمیٹی کے کچھ معاملات جینوئن ہیں، کچھ خواہشات ہیں، مہاجرین نشستوں سے متعلق ان سے بات کریں گے۔
نو منتخب وزیراعظم آزاد کشمیر نے کہا کہ سیکرٹری صاحبان کے پاس صرف ایک گاڑی ہوگی، سیکرٹریز کی تعداد 20 ہوگی، اسپشل سیکرٹری اور سینیئر سیکرٹری کا عہدے ختم کرنے کا اعلان کرتا ہوں۔
انہوں نے کہا کہ محکمہ تعلیم کی ٹینکل اسامیوں کو محکمہ تعلیم میں ضم کیا جائے گا، سرکاری ملازمتوں میں خواتین کے لیے برابر کے مواقع فراہم کریں گے، عدالتی اصلاحات کی جائیں گی۔گریڈ ایک کے ملازمین کو ایک ماہ کی اضافی تنخواہ کا اعلان کرتا ہوں۔
واضح رہے کہ وزیراعظم آزاد کشمیر چوہدری انوارالحق کے خلاف تحریک عدم اعتماد کامیاب ہوئی جس کے بعد راجہ فیصل ممتاز راٹھور نئے وزیر اعظم منتخب ہوئے۔راجہ فیصل ممتاز راٹھور کو 36ووٹ ملے، مخالفت میں 2ووٹ کاسٹ ہوئے۔
Leave a Reply