’میں پی ایس ایل کی کسی ٹیم میں ہوتا تو ان کو ضرور شامل کرتا‘، آفریدی عمر اکمل اور احمد شہزاد کے حق میں بول پڑے

فوٹو: فائل

پاکستان کرکٹ ٹیم کے سابق کپتان شاہد آفریدی پی ایس ایل 11 میں نظر انداز کیے جانے پر عمرا اکمل اور احمد شہزاد کے حق میں بول پڑے۔

بدھ کو پاکستان سپر لیگ سیزن 11 کیلئے کھلاڑیوں کی پہلی بار نیلامی کی گئی جس میں تمام 8 فرنچائزز نے ملکی اور غیر ملکی کھلاڑیوں کو اپنے اسکواڈ کا حصہ بنایا۔

بد قسمتی سے پاکستان کی جانب سے ٹی ٹوئنٹی انٹرنیشنل میں پہلی سنچری بنانے والے احمد شہزاد اور جارحانہ بیٹر عمر اکمل کو پی ایس ایل میں مکمل طور پر نظر انداز کیا گیا۔

سابق کپتان شاہد آفریدی نے نجی ٹی وی چینل پر گفتگو کرتے ہوئے عمر اکمل اور احمد شہزاد کے حق میں آواز اٹھائی۔

شاہد آفریدی نے کہا کہ میں سمجھتا ہوں کہ ہم کچھ کھلاڑیوں کو زیادہ اگنور کردیتے ہیں، مجھے امید تھی کہ 2 نئی ٹیمیں شامل ہونے کے بعد احمد شہزاد اور عمر اکمل کو پی ایس ایل کا حصہ بنایا جائے گا۔

سابق کپتان نے کہاکہ دونوں کرکٹرز کھیل بھی رہے ہیں ، پریکٹس کررہے ہیں، جم کررہے ہیں، اتنا اگنور نہیں کرنا چاہیے اور انہیں موقع دینا جاہیے تھا۔

شاہد آفریدی نے کہا کہ اگر میں کسی ٹیم میں ہوتا تو احمد شہزاد اور عمر اکمل کو ضرور شامل کرتا۔

ا ن کا کہنا تھا کہ گھر میں ہر بچہ ایک جیسا نہیں ہوتا، یہ ٹیم منیجمنٹ کا کام ہے کہ وہ کھلاڑیوں کو لے کر چلیں، میں یہ سمجھتا ہوں کہ عمر اکمل اور احمد شہزاد کسی ایک فرنچائز کا حصہ ہونا چاہیے تھا۔

واضح رہے کہ پاکستانی کرکٹر احمد شہزاد پاکستان سپر لیگ کے گیارہویں سیزن کے لیے منتخب نہ ہونے پر لائیو شو میں آبدیدہ ہوگئے تھے۔

جیو نیوز کے پروگرام ہنسنا منع ہے میں احمد شہزاد اور محمد عامر شریک تھے، میزبان تابش ہاشمی کے سوال پر احمد شہزاد نے کہا ‘مجھے بہت دکھ ہوتا ہے، ساتھی کھلاڑیوں کو دیکھ کر خوشی بھی ہوتی ہے لیکن اپنے لیے افسردہ ہوجاتا ہوں’۔

احمد شہزاد نے کہا ‘سب سے زیادہ دکھ اس بات کا ہے کہ میرا بیٹا مجھے کھیلتا دیکھنا چاہتا ہے، وہ اب 9 سال کا ہوگیا ہے’۔

قومی کرکٹر یہ بتاتے ہوئے آبدیدہ ہوگئے کہ ‘میرے ساتھ رات کو وہ سوتا ہے، وہ میرا دل رکھنے کے لیے کہتا ہے بابا مجھے یاد ہے آپ کھیلتے تھے لیکن اب میں آپ کو اچھے طریقے سے یاد رکھ پاؤں گا’۔