سپریم کورٹ نے تمام سزائے موت اور عمر قید کے مقدمات آئندہ 45 دنوں میں نمٹانےکا ہدف مقرر کردیا۔
سپریم کورٹ کی جانب سے جاری اعلامیےکے مطابق اکتوبر 2024 سے فوجداری مقدمات کی مجموعی زیر التوا تعداد 19 ہزار 549 سے کم ہو کر 12 ہزار 705 رہ گئی ہے، 9 تا 14 فروری 2026 کے دوران سپریم کورٹ نے سزائے موت اور عمرقید سے متعلق 354 فوجداری مقدمات نمٹائے۔
اعلامیےکے مطابق اسی ہفتے سزائے موت اور عمر قید سے متعلق 131 نئے مقدمات دائر ہوئے، ہفتہ وار بنیاد پر نمٹائے مقدمات کی شرح دائر ہونے والے مقدمات سے تقریباً 270 فیصد زیادہ رہی۔
اعلامیے کے مطابق عدالت عظمیٰ نے جنوری 2026 تک کے تمام زیر التوا سزائے موت کے مقدمات کو ترجیحی بنیادوں پر نمٹانےکا فیصلہ کیا ہے۔
اعلامیے میں کہا گیا ہےکہ مخصوص بینچز، اصلاحاتی گروپس اور عدالتی ٹیمیں اہداف کے حصول کے لیے سرگرم ہیں۔ چیف جسٹس پاکستان نے زیر سماعت قیدیوں سے متعلق جیل پٹیشنز منظم اور تیز رفتار بنانےکی ہدایات کی ہیں، جیل پٹیشنز کے دائر ہونےسے فیصلے تک واضح اور قابلِ پیش گوئی ٹائم لائن متعارف کرانے کا فیصلہ کیا گیا ہے۔
Leave a Reply