عمر میں اضافے کے ساتھ دماغ کو تیز رکھنا چاہتے ہیں؟ تو لکھنا یا مطالعہ کرنا عادت بنالیں۔
یہ بات امریکا میں ہونے والی ایک طبی تحقیق میں سامنے آئی۔
رش یونیورسٹی میڈیکل سینٹر کی تحقیق میں بتایا گیا کہ مطالعہ کرنے، لکھنے اور کسی نئی زبان کو سیکھنے سے دماغی تنزلی کا باعث بننے والے مرض ڈیمینشیا کا خطرہ نمایاں حد تک کم ہو جاتا ہے۔
خیال رہے کہ ڈیمینشیا ایسا مرض ہے جس کا ابھی کوئی علاج دستیاب نہیں اور 2050 تک دنای بھر میں اس کے مریضوں کی تعداد 15 کروڑ سے زائد ہونے کا امکان ہے۔
اس نئی تحقیق میں دریافت کیا گیا کہ دماغ کو متحرک کرنے والی سرگرمیوں جیسے مطالعہ، لکھنا یا کسی نئی زبان کو سیکھنے سے دماغ کو صحت مند رکھنے میں مدد ملتی ہے۔
تحقیق میں 1939 افراد کو شامل کیا گیا جن کی اوسط عمر 80 سال تھی اور آغاز میں کوئی بھی فرد ڈیمینشیا سے متاثر نہیں تھا۔
ان افراد کی صحت کا جائزہ 8 سال تک لیا گیا اور اس دوران انہیں 3 مراحل میں ذہنی سرگرمیوں اور نئی چیزیں سیکھنے سے متعلق سروسز کا حصہ بنایا گیا۔
ان افراد سے معلوم کیا گیا کہ وہ نوجوانی میں کتنا مطالعہ کرتے تھے یا کچھ لکھنا پسند کرتے تھے یا کسی غیر ملکی زبان کو سیکھا تھا یا نہیں۔
اسی طرح دوسرے مرحلے میں یہ معلوم کیا گیا کہ درمیانی عمر میں مطالعہ، لکھنے یا نئی زبان سیکھنے میں دلچسپی تھی یا نہیں۔
تیسرے مرحلے میں موجودہ عمر میں مطالعے یا دیگر تفصیلات کا ڈیٹا اکٹھا کیا گیا
تحقیق کے اختتام تک 551 افراد میں الزائمر امراض (ڈیمینشیا کی سب سے عام قسم) کی تشخیص ہوئی جبکہ 719 میں معمولی دماغی تنزلی کو ریکارڈ کیا گیا۔
تمام ترین عناصر کو مدنظر رکھنے پر محققین نے دریافت کیا گیا کہ پوری زندگی مطالعے، لکھنے یا نئی زبان سیکھنے جیسی سرگرمیوں سے ڈیمینشیا سے متاثر ہونے کا خطرہ 38 فیصد جبکہ معمولی دماغی تنزلی کا خطرہ 36 فیصد تک کم ہو جاتا ہے۔
محققین نے بتایا کہ نتائج سے عندیہ ملتا ہے کہ ہر عمر میں دماغ کو متحرک کرنے والی سرگرمیوں کو معمول بنانے سے دماغی تنزلی سے بچنے میں مدد ملتی ہے۔
اس تحقیق کے نتائج جرنل نیورولوجی میں شائع ہوئے۔
Leave a Reply