اسلام آباد: پاک بھارت کشیدگی اور جنگ بندی پر صدر مملکت آصف علی زرداری نےکہا ہےکہ جنوبی ایشیا میں پائیدار امن کا قیام تنازع کشمیر کے حل میں ہے۔
صدر مملکت آصف علی زرداری نےکہا ہےکہ مجھے پاکستان کی مسلح افواج، پاک بحریہ اور فضائیہ پر ہمیشہ سے یقین رہا ہے، ہم نے بھارتی جارحیت کا منہ توڑ جواب دیا، ہم نے بھارت کی نام نہاد فوجی قوت کو سخت ٹھیس پہنچائی ہے۔
صدر مملکت کا کہنا تھا کہ آج ہماری قوم کا عزم بے مثال ہے، یہی عزم ہمارے آباؤ اجداد کے دو قومی نظریہ کو تقویت بخشتا ہے، اللہ پر ہمارے ایمان نے حجم سے پانچ گنا زیادہ ملک کے خلاف کھڑے ہونےکی طاقت اور ہمت عطا کی۔
صدر پاکستان نے آرمی چیف، ائیر چیف، نیول چیف اور تمام افواج کو مبارک باد پیش کرتے ہوئے کہا کہ پاک افواج کی بہادری اور انتھک محنت نے اس جنگ میں ہمیں فتح سے ہمکنار کیا، قوم کو خوشی منانی چاہیے اور شہادت پانے والوں کے لیے دعا بھی کرنی چاہیے۔
صدرکا کہنا تھا کہ جنوبی ایشیا میں پائیدار امن کا قیام تنازع کشمیر کے حل میں ہے، جنوبی ایشیا میں امن کا قیام دیگر مرکزی مسائل بالخصوص سندھ طاس معاہدہ کے حل میں ہے۔
انہوں نے چین، امریکا، ترکیہ، سعودی عرب اور ایران سمیت تمام دوست ممالک کا شکریہ ادا کرتے ہوئےکہا کہ دوست ممالک اس مُشکل گھڑی میں ہمارے ساتھ کھڑے ہوئے۔
صدر مملکت کا مزید کہنا تھا کہ پاکستان اشتعال انگیزی نہیں چاہتا، امن کا خواہاں ہے، ہم اپنی خودمختاری پر کبھی سمجھوتہ نہیں کریں گے۔
Leave a Reply