بنگلادیش میں 5.7 شدت کےخوفناک زلزلے کے نتیجے میں5 افراد ہلاک، 100 زخمی ہوگئے جبکہ کئی عمارتیں کو بھی نقصان پہنچا ہے۔
بنگلا دیشی محکمہ موسمیات کے مطابق جمعہ کی صبح 5.7 شدت کا زلزلہ آیا تھا، زلزلے کے جھٹکےتقریباً 26 سیکنڈ تک رہے، لوگ خوف کے باعث گھروں سے باہر نکل آئے۔
جرمن ریسرچ سینٹر کے مطابق زلزلے کا مرکزڈھاکا سے قریب نرسنگدی شہر تھا ۔ زلزلے کی گہرائی 10کلو میٹر تھی جبکہ زلزلے کے جھٹکے بھارتی شہر کولکتا اور شمال مشرقی بھارت کے کچھ حصوں میں بھی محسوس کیے گئے۔
خبر رساں ایجنسی کے مطابق زلزلے کے نتیجے میں5 افراد ہلاک، 100 زخمی ہوگئے ہیں۔ زلزلے سے کئی علاقوں میں عمارتوں کو نقصان پہنچا۔
بنگلا دیش کی عبوری حکومت کے سربراہ محمد یونس نے زلزلے سے ہلاکتوں پر گہرے صدمے اور افسوس کا اظہا کیا۔
محمد یونس نے بتایا کہ زخمیوں میں ڈھاکا یونیورسٹی کے طلبہ، گازی پور کے فیکٹری ورکرز اور نرسنگدی کے رہائشی شامل ہیں۔
فائر ڈیپارٹمنٹ کے مطابق کچھ لوگ زیر تعمیر عمارتوں سے گرتی اینٹوں اور سیمنٹ کے ٹکڑوں کی زد میں آکر زخمی ہوئے۔
ڈھاکا کے ایک رہائشی نے خبررساں ایجنسی کو بتایا کہ میں نے اپنی زندگی میں ایسے زلزلے کے جھٹکے کبھی محسوس نہیں کیے۔ ہم دفتر میں تھے جب فرنیچر ہلنے لگا۔ ہم فوراً نیچے بھاگے اور دیکھا کہ لوگ پہلے ہی سڑک پر موجود تھے۔
بنگلادیشی حکومت نے بتایا کہ وہ صورتحال پر قریبی نظر رکھے ہوئے ہے اور متعلقہ محکموں کو ہدایات دی گئی ہیں کہ متاثرہ علاقوں میں امدادی کارروائیاں تیز کی جائیں۔
Leave a Reply