برطانیہ میں ایک شخص نے میٹل ڈیٹیکٹر کی مدد سے لاکھوں روپے مالیت کی تاریخی انگوٹھی کو تلاش کرلیا۔
16 ویں صدی کی سونے کی اس انگوٹھی کو اسٹیورٹ جونز نامی شخص نے گلوسٹرشائر کے گاؤں وارمنگٹن میں دریافت کیا۔
42 سالہ اسٹیورٹ جونز نے اس انگوٹھی کو نومبر 2024 میں میٹل ڈیٹیکٹر سے خزانہ تلاش کرنے کی مہم کے دوران ڈھونڈا تھا۔
8 ہیروں سے سجی اس انگوٹھی کو 23 جون کو نیلام کیا جائے گا اور توقع ہے کہ یہ 55 سے 75 لاکھ روپے کے درمیان فروخت ہوگی۔
اسٹیورٹ جونز برسوں سے میٹل ڈیٹیکٹر کی مدد سے قیمتی تاریخی اشیا تلاش کر رہے ہیں مگر وہ اس سے قبل کبھی وارمنگٹن نہیں آئے تھے۔
انہوں نے اس انگوٹھی کو بھی 7 گھنٹوں کی تلاش کے بعد اس وقت دریافت کیا جب وہ اس مہم کو ختم کرکے واپس جانے والے تھے۔
اسٹیورٹ جونز نے بتایا کہ ‘جب میں نے اسے دریافت کیا تو مجھے لگا کہ میں بادلوں میں پرواز کر رہا ہوں اور میرے اردگرد ہر فرد نے مجھے مبارکباد دی’۔
جب انہوں نے انگوٹھی کو مٹی سے نکالا تو ایک ہیرا ڈھیلا ہوکر نیچے گرگیا جبکہ دوسرا گم ہوگیا۔
انہوں نے انگوٹھی کے اردگرد کی مٹی کو اکٹھا کیا اور گھر جاکر چھانا اور گمشدہ ہیرے کو تلاش کرلیا۔
اس انگوٹھی کا معائنہ برٹش میوزیم میں ماہرین نے کیا اور بتایا کہ یہ بہت نایاب ڈیزائن والی انگوٹھی ہے۔
Leave a Reply