وفاقی وزیر منصوبہ بندی احسن اقبال نے بنگلادیش میں اپوزیشن لیڈر جماعت اسلامی کے امیر ڈاکٹر شفیق الرحمان سے ملاقات کی اور بنگلادیش کے لیے پاکستان کی غیر جانبدارانہ حمایت کا یقین دلایا۔
ڈھاکہ کے سرکاری دورےکے دوران وفاقی وزیر احسن اقبال نے ڈاکٹر شفیق الرحمان کو وزیراعظم شہباز شریف کی جانب سے نیک تمناؤں کا پیغام پہنچایا اور دونوں ملکوں کے درمیان سماجی، معاشی اور سیاسی شعبوں میں باہمی شراکت داری کی ضرورت کو اجاگر کیا۔
امیر جماعت اسلامی بنگلادیش سے ملاقات کے دوران احسن اقبال نے اپنے زمانہ طالب علمی کے دور کی قیادت کو بھی یاد کیا جب وہ یونیورسٹی آف انجینئرنگ اینڈ ٹیکنالوجی (یو ای ٹی) لاہور میں اسلامی جمعیت طلبہ سے وابستہ تھے۔
اس موقع پر احسن اقبال نے خوشی کا اظہار کیا کہ بنگلا دیش کے عوام سڑکوں پر پاکستان کے لیے جس والہانہ محبت اور گرمجوشی کا اظہار کرتے ہیں وہ قابل تحسین ہے۔
اس سے قبل وفاقی وزیر احسن اقبال نے ڈھاکہ میں نومنتخب بنگلا دیشی وزیراعظم طارق رحمان کی تقریب حلف برداری میں شرکت کی جس کے بعد ان کی بنگلادیشی وزیراعظم سے خصوصی ملاقات ہوئی۔
بنگلا دیشی وزیراعظم اور احسن اقبال کی ملاقات میں دوطرفہ تعلقات مضبوط بنانے کے عزم کا اعادہ کیا گیا۔
احسن اقبال نے وزیراعظم طارق رحمان کو پاکستان کے دورے کی دعوت دی۔
ملاقات میں دوطرفہ تجارت بڑھانے، بحری روابط اورسپلائی چین انضمام کے فروغ پر زور دیا گیا۔
ملاقات میں بنگلا دیش پاکستان نالج کاریڈورکے آغازپراتفاق ہوا، تعلیمی وتحقیقی روابط بڑھانے کا بھی فیصلہ کیا گیا۔
Leave a Reply