کینیڈا کے شہر سرے میں بھارتی کامیڈین کپل شرما کے حال ہی میں کھولے گئے نئے کیفے “کیپس کیفے” پر ایک بار پھر فائرنگ کی گئی ہے۔
بھارتی میڈیا کے مطابق گزشتہ ماہ کیپس کیفے کی عمارت پر نامعلوم افراد نے فائرنگ کی تھی تاہم جمعرات کو ایک بار پھر کیپس کیفے پر فائرنگ کا واقعہ رونما ہوا ۔
بھارتی میڈیا رپورٹس کے مطابق کیفے کی کھڑکیوں میں تقریباً 6 گولیوں کے نشانات پائے گئے ہیں۔
پولیس فائرنگ کی اطلاع ملتے ہی جائے وقوعہ پر پہنچی، تاہم ابھی تک واقعے سے متعلق باضابطہ تفصیلات جاری نہیں کی گئیں۔
مقامی لوگوں کا کہنا ہے کہ وہ فائرنگ کی آواز سن کر نیند سے جاگ اٹھے جبکہ سوشل میڈیا پر واقعے کی مبینہ ویڈیو بھی سامنے آئی، جس میں گولیوں کی آوازیں سنی گئیں۔
بھارتی میڈیا کے مطابق گورپریت سنگھ عرف گولڈی ڈھلوں اور لارنس بشنوئی گینگ نے مبینہ طور پر اس حملے کی ذمہ داری قبول کی ہے۔
سوشل میڈیا پر وائرل ایک مبینہ پوسٹ میں کہا گیا ہے آج جو یہ کپل شرما کے کیپس کیفے، میں فائرنگ ہوئی، اس کی ذمہ داری گولڈی ڈھلوں اور لارنس بشنوئی گینگ لیتے ہیں۔ ہم نے اس کو فون کیا لیکن اس کو فون کی گھنٹی سنائی نہیں دی، اس لیے کارروائی کرنی پڑی۔ اب بھی اگر فون نہ اٹھایا تو اگلی کارروائی جلد ہی ممبئی میں کریں گے۔
خیال رہے کہ بھارتی کامیڈین و اداکار کپل شرما نے حال ہی میں کینیڈا میں کیفے کھولا ، جسے خاصی مقبولیت حاصل ہو رہی ہے۔
گزشتہ ماہ کیفے کے افتتاح کے چند دن بعد ہی کیپس کیفے پر فائرنگ کا پہلا واقعہ ہوا تھا جس کی ذمہ داری ہر جیت سنگھ نامی دہشتگرد نے قبول کی تھی اور کپل شرما سے ان کے مبینہ قابلِ اعتراض بیان پر معافی کا مطالبہ کیا تھا۔
تاہم اب پولیس نے کیفے کے ارد گرد سکیورٹی مزید بڑھا دی ہے اور حملے کی تحقیقات جاری ہیں۔
Leave a Reply