وزیردفاع خواجہ آصف کا کہنا ہے کہ بانی پی ٹی آئی عمران خان کو اقتدار میں لانے والے چاہیں گے یہ دوبارہ اقتدار میں آئے، وہ چاہتے ہیں کہ یہ مملکت خداداد ان کی تابع ہوجائے۔
سوشل میڈیا پر جاری بیان میں خواجہ آصف کا کہنا تھا کہ پاکستان کو گالیاں نکالنے والوں کو پناہ دینے والوں کی خواہشات ہیں کہ یہ اقتدار میں آئیں، یاد رکھیں 9 مئی کو فوجی تنصیبات پر حملہ انھی مقاصد کےحصول کی کوشش تھی۔
خواجہ آصف کا کہنا تھا کہ بانی پی ٹی آئی کے دور میں بھارت نے حملہ کیا، راتوں رات ابھی نندن کو ہم نےہاتھ جوڑ کے واپس کیا، مئی 2025 میں بھارت نے حملہ کیا تو پاکستان نےفتح کی تاریخ رقم کی، دنیا حیرت زدہ رہ گئی کہ یہ وہی پاکستان ہے جس نےکچھ سال قبل بھارتی پائلٹ واپس کیا تھا۔
خواجہ آصف کے مطابق اس وقت پارلیمنٹ کو یہ بتایا گیا تھا کہ ہم بھارت سے جنگ کا رسک نہیں لے سکتے۔
وزیردفاع کا کہنا تھا کہ ہماری افواج نے اللہ کی مدد سے قوم کا سرفخر سے بلند کیا، ہمارے شہیدوں نے وطن کو جاوداں کیا، دشمن آج بھی تاک میں ہے، جاگتے رہنا۔
ان کا مزید کہنا تھا کہ یہ باہربیٹھے نام نہاد پاکستانی، طالبان سے محبت بھرے مذاکرات کے حامی وطن عزیزکی ترقی اور امن کے دشمن ہیں، یہ پاکستان کو معاشی استحکام اور محفوظ مستقبل سے دور رکھنا چاہتے ہیں۔
Leave a Reply