ابوظبی ائیرپورٹ پر 50 لاکھ درہم کی منشیات اسمگل کرنے کی کوشش ناکام بنادی گئی۔
ابوظبی کے زايد انٹرنیشنل ائیرپورٹ پر جدید ٹیکنالوجی کی مدد سے 50 لاکھ درہم (تقریباً 38 کروڑ پاکستانی روپے) مالیت کی کوکین اسمگل کرنے کی کوشش ناکام بنادی گئی۔
اماراتی حکام کے مطابق جنوبی امریکا سے آنے والا ایک مسافر نہایت مہارت سے منشیات کے 89 کیپسول اپنی آنتوں میں چھپا کرلایا تھا لیکن جدید ایکس رے اسکیننگ ٹیکنالوجی نے ملزم کو گرفتار کروا دیا۔
اماراتی حکام کا کہنا ہے کہ مسافر پر اُس وقت شک ہوا جب اس کی حرکات و سکنات معمول سے ہٹ کر محسوس ہوئیں۔
جدید آلات سے اسکیننگ کے دوران آنتوں میں موجود غیر معمولی اشیا کی نشاندہی ہوئی جس کے بعد فوری کارروائی کرتے ہوئے ملزم کو گرفتار کر لیا گیا۔ برآمد ہونے والے کیپسولز کا وزن تقریباً 1198 گرام تھا اور ان کی عالمی مارکیٹ میں مالیت تقریباً 50 لاکھ درہم بتائی گئی ہے۔
ابوظبی کی فیڈرل اتھارٹی برائے شناخت، شہریت، کسٹمز اور پورٹس سکیورٹی نے کہا کہ جدید ٹیکنالوجی اور پیشہ وارانہ مہارت سے لیس ٹیم نے اس کارروائی میں غیر معمولی کردار ادا کیا۔
Leave a Reply