فرانس میں کیوبا کے سفارت خانے نے جاپان کے چڑیا گھر میں پنچ نامی ننھے بندر کی ویڈیو پر جذباتی ہونے اور غزہ میں ہزاروں یتیم بچوں کے دکھ کو نظر انداز کرنے پر عالمی برادری کے دہرے رویے کو شدید تنقید کا نشانہ بنایا ہے۔
فرانس میں کیوبا کے سفارت خانےکی جانب سے ایکس پر ویڈیو پوسٹ کی گئی ہے جس میں ایک طرف پنچ نامی بندر کی ویڈیو ہے جو ماں کی ممتا سے محروم ہونےکے بعد کھلونےکو ہی اپنا سب کچھ سمجھتے ہوئے اس سے لپٹا ہوا ہے۔ بندر کے بچے کی اس ویڈیو نے ہر دیکھنے والوں کو جذباتی کردیا ہے اور دنیا بھر سے اس سے ہمدردی کا اظہار کیا جا رہا ہے۔
ویڈیو میں دوسری جانب غزہ کی ایک معصوم بچی ہے جو اسرائیلی بمباری میں اپنا گھر تباہ ہونے اور اپنے پیاروں کو کھونے کے بعد غم کی تصویر بنے اپنی گڑیا کو سینے سے لگائے ملبے کے ڈھیر پر کھڑی ہے۔
کیوبن سفارت خانے نے اپنی پوسٹ میں عالمی برداری کے تضاد سے بھرے رویے پر تنقید کرتے ہوئے لکھا کہ دنیا ایک بندرکی جانب سے کھلونا گلے لگانے کی ویڈیو پر جذباتی ہو جاتی ہے، لیکن اسی وقت غزہ میں ہزاروں یتیم بچوں کے دکھ اور تکالیف کو نظر انداز کر دیا جاتا ہے، جن کے اہل خانہ اسرائیلی حملوں میں مارے جا چکے ہیں۔
کیوبن سفارت خانے نے اس منتخب ہمدردی (Selective empathy) کو ایک شرمناک رویہ قرار دیا ہے۔
کیوبن سفارت خانے کی یہ ٹوئٹ سوشل میڈیا پر زیر بحث ہے اور مختلف حلقوں کی جانب سے اس پر ردعمل سامنے آ رہا ہے۔
Leave a Reply