متعدد آن لائن پوسٹس میں یہ دعویٰ کیا جا رہا ہے کہ اسلام آباد کی انتظامیہ نے حال ہی میں ایک این او سی (NOC) واپس لے کر شوکت خانم میموریل کینسر اسپتال (SKMCH) کو فنڈ ریزنگ کی تقریب منعقد کرنے سے روک دیا ہے۔
یہ دعویٰ غلط ہے۔
دعویٰ
15فروری کو ایک سیاسی رہنما اور سندھ کے سابق گورنر محمد زبیر نے ایکس (سابقہ ٹوئٹر) پر ایک نیوز گرافک شیئر کیا جس پر لکھا تھا: ”بریکنگ نیوز: کراچی میں شوکت خانم ہسپتال کی فنڈ ریزنگ تقریب کا پرمٹ منسوخ کر دیا گیا ہے۔“
محمد زبیر نے اس کے بعد فنڈ ریزنگ کی تقریب منسوخ کرنے پر حکومت پر ’ظلم و بربریت‘ کا الزام عائد کیا۔
اس آرٹیکل کے شائع کئے جانے کے وقت تک اس پوسٹ کو 1 لاکھ 81 ہزار سے زائد مرتبہ دیکھا جا چکا تھا، جبکہ اسے تقریباً 3,ہزار مرتبہ ری پوسٹ اور قریباً 7 ہزار بار لائک کیا گیا۔
یہی دعویٰ دیگر کئی سوشل میڈیا صارفین کی جانب سے مختلف پلیٹ فارمز پر یہاں، یہاں اور یہاں بھی شیئر کیا گیا۔
حقیقت
انتظامیہ نے حال ہی میں ہونے والی کسی بھی فنڈ ریزنگ تقریب کی اجازت منسوخ نہیں کی۔ تاہم، اس طرح کا ایک واقعہ دسمبر 2023 میں پیش آیا تھا۔
سابق وزیراعظم عمران خان کے ہاتھوں 1994 میں قائم ہونے والے فلاحی ادارےشوکت خانم میموریل کینسر اسپتال نے 15 فروری کو ایکس پر بیان جاری کیا کہ وائرل ہونے والی یہ پوسٹس دراصل 29 دسمبر 2023 کے ایک واقعے سے متعلق ہیں، جب اسلام آباد میں شوکت خانم کراچی کے لیے ایک فنڈ ریزنگ گالا منعقد ہونا تھا اور اسلام آباد انتظامیہ نے اس تقریب کا این او سی (NOC) واپس لے لیا تھا۔
اسپتال نے اپنے بیان میں کہا کہ ”اس وقت سے اب تک فنڈز جمع کرنے اور تعمیرات کا کام بغیر کسی تعطل کے جاری ہے، کراچی اسپتال کا افتتاح دسمبر 2026 میں ہی متوقع ہے۔“
اسپتال کے ایک ترجمان نےجیو فیکٹ چیک کے ساتھ ڈسٹرکٹ مجسٹریٹ آفس، اسلام آباد کا 27 دسمبر 2023 کی تاریخ کا ایک سرکاری لیٹر شیئر کیا۔ اس خط میں اسپتال کو اسلام آباد میں 29 دسمبر کو ہونے والا فنڈ ریزنگ گالا منسوخ کرنے کی ہدایت کی گئی تھی اور تنبیہ کی گئی تھی کہ اگر اس ہدایت پر عمل نہ کیا گیا تو قانونی کارروائی شروع کر دی جائے گی۔
متعدد قومی میڈیا اداروں نے بھی دسمبر 2023 میں یہ رپورٹ کیا تھا کہ اسلام آباد کیپیٹل ٹیریٹری (ICT) کے ڈسٹرکٹ مجسٹریٹ نے اسلام آباد کے ایک مقامی ہوٹل میں فنڈ ریزنگ کی تقریب کے لیے اسپتال کو جاری کردہ این او سی (NOC) واپس لے لیا تھا۔
فیصلہ: سوشل میڈیا پر حال ہی میں شیئر کیا جانے والا نیوز گرافک دراصل دسمبر 2023 کا ہے اور اس کا اسلام آباد انتظامیہ کے کسی حالیہ فیصلے سے کوئی تعلق نہیں ہے۔
ہمیں X (ٹوئٹر) GeoFactCheck@ اور انسٹا گرام geo_factcheck@ پر فالو کریں۔ اگر آپ کو کسی بھی قسم کی غلطی کا پتہ چلے تو [email protected] پر ہم سے رابطہ کریں۔
Leave a Reply