کیا آپ کسی کمپنی کے لیے ورک فرام ہوم کر رہے ہیں، تو کیا کسی اور ملک میں منتقل ہونا پسند کریں گے؟
اگر ہاں تو سری لنکا آپ کو خوش آمدید کہنے کے لیے تیار ہے۔
خیال رہے کہ ورک فرام ہوم بیشتر افراد کی زندگی کا معمول بنتا جارہا ہے یعنی دفتر جانے کی ضرورت نہیں رہی، تو وہ اپنے کام کے ساتھ دنیا کو دیکھنے کو بھی کوشش کررہے ہیں۔
ایسے افراد کے لیے ڈیجیٹل نوماڈ کی اصطلاح استعمال کی جاتی ہے۔
سری لنکا کی جانب سے نیا ڈیجیٹل نوماڈ ویزا پروگرام متعارف کرایا جا رہا ہے۔
اس ویزا پروگرام کا مقصد غیر ملکی پروفیشنلز کی توجہ حاصل کرنا ہے تاکہ وہ سری لنکا میں رہتے ہوئے کام کرسکیں۔
اس پروگرام کے لیے چند شرائط کو پورا کرنا ہوگا جیسے کسی ایسی کمپنی کی ملازمت ضروری ہوگی جو سری لنکا سے تعلق نہ رکھتی ہو، فری لانسر یا اپنا کاروبار جو سری لنکا میں رجسٹرڈ نہ ہو۔
ان افراد کی کم از کم آمدنی 2 ہزار ڈالرز ہونا ضروری ہوگی جبکہ اگر 2 سے زائد افراد پر مشتمل خاندان ہوگا تو ہر فرد کے ساتھ ماہانہ آمدنی میں فی کس 500 ڈالرز کا اضافہ ہوگا۔
درخواست گزاروں کو کم از کم ماہانہ آمدنی کا ثبوت بھی فراہم کرنا ہوگا۔
ان افراد کی ہیلتھ انشورنس اور سری لنکا میں قیام کے دوران رہائش کے انتظامات کو بھی یقینی بنانا ہوگا۔
سیاسی سرگرمیوں سے گریز کرنا ہوگا جبکہ اپنے آبائی ملک میں جرائم سے پاک ریکارڈ کا ثبوت پیش کرنا ہوگا۔
درخواست گزاروں کو ویزا کے لیے فی کس 500 ڈالرز ادا کرنا ہوں گے۔
انہیں مطلوبہ دستاویزات سری لنکا محکمہ امیگریشن کو فراہم کرنا ہوں گی اور اگر ویزا مل جاتا ہے تو وہ سری لنکا میں ایک سال قیام کر سکیں گے جس میں مزید اضافہ بھی ممکن ہے۔
درخواست گزاروں کو سری لنکن ٹیکس رجسٹریشن کا ثبوت بھی جمع کرنا ہوگا۔
اس ویزا کو حاصل کرنے والے افراد کو سری لنکا میں ذاتی بینک اکاؤنٹ کھولنے کی اجازت ہوگی جبکہ اپنے بچوں کو اسکولوں میں داخل کراسکیں گے۔
اگر اس فرد کی ملازمت، آمدنی یا خاندان میں کوئی تبدیلی آتی ہے تو اسے 30 دن کے اندر سری لنکن محکمہ امیگریشن کو آگاہ کرنا ہوگا۔
Leave a Reply