اسلام آباد: بانی پی ٹی آئی عمران خان کے خلاف توشہ خانہ کیس سے متعلق فوجداری درخواستیں سپریم کورٹ میں سماعت کیلئے مقرر ہوگئیں۔
اسلام آباد ہائیکورٹ میں کارروائی مکمل ہونے کے بعد کیس دوبارہ سپریم کورٹ نےسماعت کےلیے مقرر کردیا۔
چیف جسٹس یحییٰ آفریدی کی سربراہی میں 2 رکنی بینچ عمران خان کے خلاف توشہ خانہ کیس سے متعلق فوجداری درخواستوں پر سماعت کرے گا۔جسٹس شاہد بلال حسن 2 رکنی بینچ کا حصہ ہوں گے۔
واضح رہے کہ ٹرائل کورٹ نے بانی پی ٹی آئی کو 3 سال قید کی سزا سنائی تھی اور اسلام آباد ہائیکورٹ نے پھر بانی پی ٹی آئی کی سزا معطل کر دی تھی۔بانی پی ٹی آئی کو الیکشن ایکٹ کی دفعات 167 اور 173 کے تحت سزا سنائی گئی تھی۔
عمران خان کے خلاف توشہ خانہ فوجداری کیس پر 9 فروری کو سماعت ہوگی۔
درخواست میں مؤقف اختیار کیا گیا ہے کہ ٹرائل کورٹ نے ہائیکورٹ ریمانڈ حکم نظرانداز کیا ، ٹرائل کورٹ نےہائیکورٹ کی ہدایات پرعمل نہیں کیا۔ ہائیکورٹ کے حکم کے بعد ٹرائل کورٹ کا فیصلہ سنانا قانونی اختیار سے تجاوز تھا، ٹرائل کورٹ کی کارروائی کو غیر قانونی قرار دیا جائے۔
ہائی کورٹ میں سزا معطلی کی درخواست زیر سماعت ہونے پر سپریم کورٹ نے اگست 2023 میں سماعت مؤخر کر دی تھی۔
Leave a Reply