اگر زندگی میں فالج جیسے جان لیوا مرض سے خود کو محفوظ رکھنا چاہتے ہیں تو ایک مخصوص غذا کا استعمال عادت بنالیں۔
جرنل نیورولوجی اوپن ایسسز میں شائع تحقیق میں بتایا گیا کہ Mediterranean diet کا استعمال خواتین میں فالج کی ہر قسم سے متاثر ہونے کا خطرہ کم کرتا ہے۔
اسپین، یونان، اٹلی اور فرانس جیسے ممالک کے شہریوں کی یہ عام غذا پھلوں، سبزیوں، اجناس، گریوں، مچھلی، زیتون کے تیل وغیرہ پر مشتمل ہوتی ہے (سرخ گوشت کا استعمال بہت کم کیا جاتا ہے)۔
اس تحقیق میں بتایا گیا کہ یہ غذا فالج کی سب سے عام قسم اور برین ہیمرج دونوں کا خطرہ کم کرتی ہے۔
محققین کے مطابق نتائج سے ان شواہد کو تقویت ملتی ہے کہ صحت کے لیے مفید غذا کا استعمال فالج سے تحفظ کے لیے ضروری ہے۔
انہوں نے بتایا کہ اہم بات یہ ہے کہ یہ غذا برین ہیمرج کا خطرہ بھی کم کرتی ہے اور بہت کم تحقیقی رپورٹس میں فالج کی اس قسم پر غذائی اثرات کا جائزہ لیا گیا ہے۔
تحقیق میں ایک لاکھ 5 ہزار سے زائد خواتین کو شامل کیا گیا تھا جن کی اوسط عمر 53 سال تھی اور ان میں فالج کی تاریخ نہیں تھی۔
تحقیق کے آغاز میں ان خواتین سے سوالنامے بھروا کر غذائی عادات کی تفصیلات جمع کی گئیں۔
اس کے بعد ان کی صحت کا 21 سال تک جائزہ لیا گیا جس دوران 4083 خواتین کو فالج کا سامنا ہوا۔
تمام تر عناصر کو مدنظر رکھنے کے بعد محققین نے دریافت کیا کہ Mediterranean diet کے استعمال سے فالج کی مختلف اقسام سے متاثر ہونے کا خطرہ 16 سے 25 فیصد تک گھٹ جاتا ہے۔
محققین کے مطابق فالج دنیا میں اموات اور معذوری کی ایک بڑی وجہ ہے تو غذاؤں سے آپ اس جان لیوا مرض سے متاثر ہونے کا خطرہ کم کرتے ہیں۔
انہوں نے کہا کہ نتائج کی تصدیق کے لیے مزید تحقیق کی ضرورت ہے تاکہ معلوم ہوسکے کہ یہ غذا کیسے فالج سے تحفظ فراہم کرتی ہے۔
Leave a Reply