کراچی: شارع فیصل پر گزشتہ روز احتجاجی مارچ کرنے پر امیر جماعت اسلامی کراچی منعم ظفر اور دیگر کے خلاف ایف آئی آر درج کرلی گئی۔
ایف آئی آر کے متن کے مطابق شاہراہ فیصل پر بغیر اجازت جلسہ کیا گیا اور ایمبولنس اور دیگر گاڑیوں کو روکا گیا۔
اس حوالے سے ترجمان جماعت اسلامی کراچی کا کہنا ہے کہ سندھ حکومت نےجینے دو کراچی مارچ کرنے پر تھانہ ٹیپو سلطان میں مقدمہ درج کیا۔
ترجمان کا کہنا ہے کہ ایف آئی آر سے ڈرنے والے نہیں، حقوق کی تحریک جاری رہے گی، 14 فروری کو سندھ اسمبلی کے باہر دھرنا دیا جائے گا۔
خیال رہے کہ گزشتہ روز جماعت اسلامی کی جانب سے کراچی کی شارع فیصل پر جینے دو کراچی مارچ کا انعقاد کیا گیا تھا۔
مارچ سے خطاب کرتے ہوئے امیر جماعت اسلامی پاکستان حافظ نعیم الرحمان کا کہنا تھا کہ پیپلز پارٹی نے سندھ کو یرغمال بنایا ہوا ہے، ہمیں قبضےکا یہ نظام ختم کرنا ہوگا۔
حافظ نعیم کا کہنا تھا کہ 14 فروری کو تاریخی دھرنا دیں گے، اس بار سندھ اسمبلی کے باہر دھرنا دیں گے تو اختیار لے کر اٹھیں گے۔
Leave a Reply