خیبر: وادی تیراہ میں 4 روزہ ریسکیو آپریشن مکمل کرلیا گیا اور مین روڈ آمد ورفت کے لیے بحال کردی گئی ہے۔
ضلع خیبر کے ریسکیو 1122 کے ترجمان مقصود عالم نے جیو نیوز کو بتایا کہ 10 جنوری سے وادی تیراہ میں مقامی شہریوں کی نقل مکانی شروع ہوگئی تاہم 22 جنوری کی برفباری کے باعث نقل مکانی کرنے والے سیکڑوں متاثرہ خاندان راستے میں پھنس گئے اور بچوں اور خواتین سمیت سیکڑوں متاثرین ٹرکوں میں محصور ہوگئے جب کہ 22 جنوری کو حکام بالا کے احکامات پر ریسکیو آپریشن شروع کردیا۔
ترجمان کے مطابق اس آپریشن میں ضلع خیبر کے علاوہ پشاور مردان ، صوابی اور نوشہرہ کے ریسکیو ٹیموں نے حصہ لیا، مین روڈ سے برف ہٹانے سمیت متاثرین کو ریسکیو کرنے کا کام شروع کردیا۔
4 روزہ ریسکیو آپریشن کے بعد آج باڑہ سے تیراہ جانے والی مین روڈ کو مکمل طور پر آمدورفت کے بحال کردیا گیا ہے۔
اس دوران ٹی ڈی پیز لے جانے والی 480 گاڑیوں سمیت 2400 متاثرین کو کامیابی سے ریسکیو کرلیا گیا، برفباری میں پھنسے 200 سے زائد زخمیوں اور مریضوں کو طبی امداد فراہم کرلیا گیا۔
ترجمان مقصود عالم کے مطابق ریسکیو آپریشن مکمل ہونے کے باوجود وادی تیراہ کے 3 مقامات پر یعنی پائندی چینہ، دوہ توئی اور مہربان کلی کے مقام ریسکیو بیس کیمپ قائم کردیا گیا ہے۔
مقصود احمد نے بتایا کہ ریسکیو آپریشن کے لیے 170 اہلکار، 27 وہیکلز ، 21 ایمبولینسز، 4 ایکسکیویٹرز 6 ٹریکٹرز سمیت دیگر مشینریز تعینات کردی گئی ہیں، اس کے علاوہ محکمہ سی اینڈ ڈبلیو ہائی ویز کا عملہ اور مشینریز تعینات ہے۔
انہوں نے مزید بتایا کہ ریسکیو آپریشن مکمل ہوتے ہی آج سے وادی تیراہ میدان کے متاثرین کی رجسٹریشن کا عمل دوبارہ شروع کردیا گیا ہے جب کہ رجسٹریشن کے چاروں سینٹرز بحال کردیا گیاہے۔
پی ڈی ایم اے ریکارڈ کے مطابق علاقہ میدان سے 4 روز قبل تک نقل مکانی کرنے والے تقریباً 10 ہزار خاندانوں کی رجسٹریشن مکمل کرلی گئی تھی جس میں بیشتر نقل مکانی بھی کرچکے ہیں، علاقہ میدان کی مجموعی آبادی ایک لاکھ 30 ہزار نفوس پر مشتمل ہے۔
Leave a Reply