پاکستان نے اقوام متحدہ کی سلامتی کونسل کے اجلاس میں وینزویلا میں امریکی کارروائی پر گہری تشویش کا اظہار کردیا۔
وینزویلا کی صورتحال پر سلامتی کونسل کے ہنگامی اجلاس سے خطاب کرتے ہوئے پاکستانی قائم مقام مندوب عثمان جدون نےکہاکہ کیریبین خطے میں عدم استحکام علاقائی اور عالمی امن وسلامتی کےلیے نیک شگون نہیں کیونکہ دنیا پہلے ہی کئی بحرانوں سے دوچار ہے۔
پاکستانی قائم مقام مندوب نے زور دیا کہ اقوام متحدہ کے چارٹر کے مطابق کسی بھی ملک کی سرحدی سالمیت یا سیاسی آزادی کے خلاف طاقت کا استعمال یا دھمکی سے گریز کرنا لازم ہے، یو این منشور دوسروں کے اندرونی معاملات میں عدم مداخلت کا پابند بناتا ہے۔
پاکستانی قائم مقام مندوب عثمان جدون نے یکطرفہ فوجی کارروائی کو یو این چارٹر اور ریاستی خود مختار استثناکے نظریےکی خلاف ورزی قرار دیا۔
انہوں نے واضح کیاکہ اس طرح کے اقدامات عالمی قانونی ڈھانچےکی بنیادوں کو کمزور کرنے کا باعث بن سکتے ہیں، ساتھ ہی خبردار کیاکہ یہ اقدامات آنے والے برسوں تک غیر متوقع اور بےقابو نتائج کا سبب بن سکتے ہیں۔
پاکستانی سفیر نے نازک مرحلے میں مکالمے اور سفارت کاری کو آگے بڑھنے کا واحد راستہ قرار دیا اور فریقین پر انتہائی تحمل کا مظاہرہ کرنے، کشیدگی میں کمی کرنے اور پُرامن بقائے باہمی کو فروغ دینے پر زور دیا۔
Leave a Reply