کراچی: گورنرسندھ کامران ٹیسوری نے کہا ہے کہ پی ٹی آئی کے ساتھ وہی رویہ اختیار کیا جائے جو ایم کیوایم کے ساتھ کیا گیا تھا۔
گورنرسندھ کامران ٹیسوری نے چیئرمین ایم کیو ایم خالد مقبول صدیقی ، فاروق ستار اور سید امین الحق کے ساتھ مشترکہ پریس کانفرنس کرتے ہوئے کہا کہ برطانیہ جیسے ملک میں ہمارے فیلڈ مارشل کے خلاف ایسی زبان استعمال کی گئی،یہ دہشت گردی کے زمرے میں آتاہے۔
کامران ٹیسوری نے کہا کہ پی ٹی آئی بیرون ملک پاکستانیوں کو ورغلارہی ہے، لوگ اس بیانیے سے دور رہیں، یہ بیانیہ نہیں چلے گا، پی ٹی آئی کا برطانیہ میں مقابلہ کرنے کیلئے بھی تیار ہیں۔
پی ٹی آئی کے ایم این اے اور کارکنوں کو عمران خان سے لاتعلقی کا اظہار کرنا چاہیے: گورنرسندھ
گورنر سندھ کا کہنا تھا کہ پی ٹی آئی کے ساتھ وہی رویہ اختیار کیا جائے جو ایم کیوایم کے ساتھ کیا گیا تھا۔مذاکرات کے نام پر دکان کھول کررکھی ہے۔پی ٹی آئی سے مذاکرات بھی نہیں ہونے چاہئیں۔بانی پی ٹی آئی کو اتنی سہولیات جیل میں میسرہیں کہ وہ باہرنہیں آنا چاہ رہے۔
انہوں نے کہا کہ پی ٹی آئی کے ایم این اے اور کارکنوں کو عمران خان سے لاتعلقی کا اظہار کرنا چاہیے، انہیں بھی پاکستانی ہونے کا ثبوت دینا چاہیے جیسے ہم نے دیا ہے۔
چیئرمین ایم کیو ایم خالد مقبول صدیقی نے کہا کہ پی ٹی آئی کے کارکنان کو شخصیت سے نکل کر عوام کےلیے آواز بلند کرنی چاہیے۔
انہوں نے کہا کہ ایک ایمرجنسی کی صورتحال سے کراچی گزر رہا ہے،حکومت کی جانب سے مسلسل رکاوٹ ڈالی جارہی ہے،گورنر وفاق کے نمائندے ہیں، ان سے درخواست کی ہے اپنا آئینی کردار ادا کریں۔
Leave a Reply