لاہور: وزیر اطلاعات پنجاب عظمیٰ بخاری نے کہا ہے کہ پراپرٹی اونر شپ آرڈیننس ایکٹ کی صورت اختیار کر چکا جس کے تمام حقائق لارجر بینچ کے سامنے رکھیں گے۔
ایک بیان میں عظمیٰ بخاری نے کہا کہ پراپرٹی اونرشپ آرڈیننس ایکٹ کی صورت اختیار کر چکا، اسمبلی نے اسے پاس کردیا ہے۔
انہوں نے کہا کہ لوگوں کی زمینوں پر قبضہ ہوجاتا ہے، بیوہ، یتیم بچوں، بھائی بہن کی زمین پر قبضہ کرلیتا ہے، 75 سال سے لوگوں کی زمینوں پر قبضہ ہورہا ہے، قبضہ مافیا بوگس دستاویزات کے ذریعہ قبضہ کرلیتے ہیں، لوگ سالہا سال کیس عدالتوں میں لڑتے تھے، شنوائی نہیں ہوتی تھی، ڈرا دھمکا کر چپ کرادیا جاتا تھا۔
وزیر اطلاعات پنجاب نے مزید کہا کہ صوبائی اسمبلی صوبے کی بہتری کے لیے کوئی بھی قانون سازی کرسکتی ہے، وزیراعلیٰ نے کہا کہ اسٹے سے قبضہ مافیا مضبوط ہوگا، ہم تمام حقائق لارجر بینچ کے سامنے رکھیں گے، اس سے عام آدمی کا بھلا ہورہا ہے، میں یہ نہیں کہہ رہی کہ وہاں سے فیصلہ غلط آیا، ہم نے کیس صحیح پیش نہیں کیا۔
ان کا کہنا تھا کہ پرانے سسٹم میں کسی کو ڈرا دھمکا کر زمین پر قبضہ کیا جاسکتا تھا اب یہ نہیں چل سکتا، ٹیکنیکل ایشو ہے، اس پر عدلیہ رہنمائی دے تو سوچا جاسکتا ہے،صوبے میں پالیسی کیا ہوگی،کیسے بنے گی، اس کا اختیار چیف ایگزیکٹیو اوراسمبلی کے پاس ہے۔
Leave a Reply