اسلام آباد: اقتصادی رابطہ کمیٹی نے لاپتا افراد کے اہلخانہ کو مالی امداد دینے کی منظوری دے دی۔
وزیرخزانہ محمد اورنگزیب کی زیرصدارت اقتصادی رابطہ کمیٹی کا اجلاس ہوا جس میں وزارت خزانہ نے بریفنگ دیتے ہوئے کہا کہ دانش اسکولز کے قیام کے لیے 5 ارب 76 کروڑ روپے اور یوتھ اسکل ڈیولپمنٹ پروگرام کے لیے فنڈز جاری کرنے کی منظور دی گئی ہے۔
ای سی سی نے دانش اسکولز میں پبلک پرائیوٹ پارٹنرشپ پرغور کرنے کی ہدایت کی ہے جبکہ سندھ اور خیبرپختونخوا میں ترقیاتی اسکیموں اور پی ٹی ڈی سی کے لیے اضافی بجٹ کی منظوری بھی دے دی۔
وزارت خزانہ نے نے مزید بتایا کہ ای سی سی کی پی ٹی ڈی سی کو جامع بزنس پلان پیش کرنے کی ہدایت کی گئی ہے جب کہ ای سی سی میں فین ریپلیسمنٹ پروگرام کے قواعد میں تبدیلی کی منظوری دی گئی ہے۔
وزارت خزانہ کے مطابق نیا طریقہ کار بجلی کے استعمال میں کمی کے لیے ہوگا، ڈسکوز کے مالی مسائل حل کرنے کے لیے 200 ارب روپے منظورکیے گئے ہیں، بجلی کے منصوبوں کے لیے 6.35 ارب روپے کی منظوری دی گئی ہے۔
اس کے علاوہ لاپتا افراد کے 945 خاندانوں کو 4 ارب 77 کروڑ روپے مالی امداد دینے کی منظوری دی گئی ہے ، ایف سی بلوچستان اور رینجرز کے ہیلی کاپٹرز کی مرمت کے فنڈز، اراکینِ پارلیمنٹ کے 104 نئے فیملی سوئٹس کی تعمیر کی منظوری بھی دی گئی ہے۔
Leave a Reply