وزیرمملکت برائے داخلہ طلال چوہدری نے کہا ہے کہ عمران خان کے بہت سارے فیصلے فیض حمید کے مشورے پر تھے، ریڈ لائنز کراس کرنیوالے کی سیاست ختم شد ہے۔
جیو نیوز کے پروگرام نیا پاکستان میں گفتگو کرتے ہوئے طلال چوہدری کا کہنا تھاکہ ہم نے آمریت کا بھی سامنا کیا ہے، سیاسی آمر بانی پی ٹی آئی کا بھی سامنا کیا، بہت سارے لوگوں نے ن لیگ کو ختم کرنے کی کوشش کی لیکن عوام ہمیں کارکردگی پر ووٹ دیتے ہیں، پنجاب کا کسی صوبے سے موازنہ کرلیں۔
انہوں نے کہاکہ فیض حمید کو ریڈ لائنز کراس کرنے پر سزا ہوئی ہے، بھارت سے مدد لینا، بھارتی ایجنڈا آگے بڑھانا، 9 مئی کیا یہ کوئی سیاسی جماعت کرسکتی ہے؟ ریڈ لائنز کراس کرنے والے کی سیاست ختم شد ہے، ہماری توجہ عوام کی زندگی بہتر بنانا ہے دہشتگردی ختم کرنی ہے۔
طلال چوہدری کا کہنا تھاکہ جنہوں نے پاکستان کو نقصان پہنچایا ان کا احتساب کیوں نہ ہو، بانی پی ٹی آئی کے بہت سارے فیصلے فیض حمید کے مشورے پر تھے، کافی چانسز ہیں حکومت سے نکلنے کے بعد جو کچھ ہوا ان کے مشورے پر ہوا، بانی پی ٹی آئی اور فیض حمید کا گٹھ جوڑ پوری دنیا کو پتا ہے، بانی پی ٹی آئی کے گھر پر کیا پکنا ہے اس کا فیصلہ بھی فیض حمید کرتے تھے، بینفیشری تو اس سب میں پی ٹی آئی تھی نقصان پاکستان کے عوام کا ہوا۔
ان کا کہنا تھاکہ ادارے خود احتسابی کررہے ہیں، عدلیہ اور سیاسی جماعتوں کو بھی کرنی چاہیے، یہ نہیں ہوسکتا کہ یہ سب کچھ کرنے والا سیاست بھی کرے۔
خیال رہے کہ گزشتہ روز سابق ڈی جی آئی ایس آئی لیفٹیننٹ جنرل (ر) فیض حمید کو 14 سال قید بامشقت کی سزا سنائی گئی۔
آئی ایس پی آر کے مطابق ملزم کے خلاف 4 الزامات پر کارروائی کی گئی، ان الزامات میں سیاسی سرگرمیوں میں ملوث ہونا، ریاست کی سلامتی اور مفادات کے لیے نقصان دہ آفیشل سیکرٹ ایکٹ کی خلاف ورزی، اختیارات اور سرکاری وسائل کا غلط استعمال اور بعض افراد کو ناجائز نقصان پہنچانا شامل ہیں۔
Leave a Reply