ترجمان دفتر خارجہ نے واشنگٹن ڈی سی میں فائرنگ کے واقعے کی شدید الفاظ میں مذمت کرتے ہوئے کہا پاکستان نے جن حملوں کا سامنا کیا ان کے روابط واضح طور پر افغانستان سے ملتے ہیں۔
ہفتہ وار پریس بریفنگ دیتےہوئے ترجمان دفتر خارجہ طاہر اندرابی کا کہنا تھا واشنگٹن ڈی سی میں فائرنگ کے واقعے میں ہلاک ہونے والے امریکی فوجی کے ساتھ دلی ہمدردی کا اظہار کرتے ہیں، فائرنگ سے زخمی ہونے والوں کی جلد صحتیابی کے لیے دعاگو ہیں، مخصوص ہدف پر حملہ بلاشبہ امریکی سرزمین پر دہشتگردی کی سنگین واردات ہے۔
ترجمان دفتر خارجہ کا کہنا تھا پاکستان نے جن حملوں کا سامنا کیا ان کے روابط واضح طور پر افغانستان سے ملتے ہیں، دہائیوں سے پاکستان نے بےشمار دہشتگردی کے واقعات کا سامنا کیا، واشنگٹن کا واقعہ عالمی سطح پر دہشتگردی کی پریشان کن واپسی کو ظاہر کرتا ہے، عالمی برادری انسدادد ہشتگردی کےلیے مشترکہ کوششوں کو تیز کرے۔
ان کا کہنا تھا تاجکستان میں 3 چینی شہریوں کے قتل کی بھی مذمت کرتے ہیں، افغانستان اپنی سرزمین سے خطے میں دہشتگردی روکے، پاکستان مسائل کے پر امن حل کا حامی ہے۔
طاہر اندرابی کا کہنا تھا سندھ سے متعلق بھارتی بیانات خام خیالی پر مبنی ہیں، پاکستان اپنے دفاع پر کوئی سمجھوتا نہیں کرے گا۔
انہوں نے کہا کہ مقبوضہ کشمیر میں کشمیریوں کو بھارتی جبر، قید، تشدد اور بہیمانہ ظلم کا سامنا ہے، پاکستان بھارت کے ساتھ مسائل کا بات چیت کے ذریعے پرامن حل کا حامی ہے، یواین ماہرین کی حالیہ رپورٹ میں مقبوضہ کشمیر میں انسانی حقوق کی پامالی کوبےنقاب کیاگیا، رپورٹ کے مطابق 2800 کشمیری بھارتی حراست میں ہیں۔
انہوں نے کہا کہ پاکستان بھارت پر جبری اقدامات کے خاتمے اور قیدیوں کی رہائی کے لیے دباؤ ڈالتا ہے، پاکستان کو تاریخی بابری مسجد کی جگہ مندر کا جھنڈا لہرانے پر سخت تحفظات ہیں، پاکستان کو بھارت میں اقلیتوں بالخصوص مسلمانوں کے خلاف نفرت انگیز اقدامات پر تحفظات ہیں۔
ترجمان دفتر خارجہ کا کہنا تھا ہم اسرائیل کے فلسطین بالخصوص غزہ پر حملوں کی مذمت کرتے ہیں، حملوں میں متعدد نہتے عوام بالخصوص عورتیں اور بچے شہید ہوئے۔
Leave a Reply