پی ٹی آئی قیادت پریشان، حکمت عملی پر نظرثانی کیلئے مجبور

یہ شکست پارٹی میں ایک وارننگ سمجھی جا رہی ہے کہ موجودہ طرز سیاست شاید اب مزید قابل عمل نہیں رہا۔ فوٹو فائل

اسلام آباد: پاکستان تحریک انصاف (پی ٹی آئی) کی قیادت ہری پور کے ضمنی انتخاب میں ہونے والی مبینہ طور پر ’’مینجڈ‘‘ مگر غیر متوقع شکست پر مایوس ہے، یہ خیبر پختونخوا کا وہ اہم حلقہ ہے جہاں پارٹی کی صوبائی حکومت قائم ہے۔

پارٹی ذرائع کے مطابق، اس شکست نے اعلیٰ قیادت میں سنجیدہ غور و فکر کو جنم دیا ہے، اور یہ بحث شروع ہوگئی ہے کہ کیا پارٹی کی طویل عرصے سے جاری محاذ آرائی کی پالیسی کی وجہ سے اس کیلئے سیاسی میدان پھیلنے کی بجائے اب اپنے ہی گڑھ خیبر پختونخوا میں بھی سکڑتا جا رہا ہے۔

اطلاعات ہیں کہ قیادت اب مذاکرات کی سیاست اختیار کرنے پر غور کر رہی ہے۔ ذرائع نے بتایا کہ سینئر رہنما ہری پور کی شکست کا جائزہ لے رہے ہیں اور سمجھتے ہیں کہ جس سیاسی میدان کو پی ٹی آئی گزشتہ کئی ماہ سے حاصل کرنے کی کوشش کر رہی تھی وہ ’’خیبر پختونخوا میں بھی سکڑ رہا ہے،‘‘ حالانکہ صوبے میں پارٹی کی اپنی ہی حکومت ہے۔

سابق قومی اسمبلی میں قائدِ حزب اختلاف عمر ایوب خان کی نااہلی کے نتیجے میں خالی ہونے والی نشست پر ہونے والے انتخاب کے نتیجے میں ملنے والی یہ شکست پارٹی میں ایک وارننگ سمجھی جا رہی ہے کہ موجودہ طرز سیاست شاید اب مزید قابل عمل نہیں رہا۔

باخبر ذرائع نے دی نیوز کو بتایا کہ ضمنی انتخاب کے نتائج کے فوراً بعد پی ٹی آئی چیئرمین بیرسٹر گوہر علی خان، عمر ایوب خان سے ان کی رہائشگاہ پر ملاقات کیلئے گئے جہاں دونوں رہنماؤں نے صورتحال پر مفصل بات چیت کی۔

بیرسٹر گوہر کے بقول انہوں نے ’’گزشتہ تین برسوں میں پارٹی کی سیاسی حکمت عملی کے فوائد اور نقصانات‘‘ کا جائزہ لیا۔

بیرسٹر گوہر نے رابطہ کرنے پر ملاقات کی تصدیق کی اور بتایا کہ انہوں نے اور عمر ایوب نے پارٹی کے مستقبل کے لائحہ عمل پر بات کی۔

عمر ایوب کی اہلیہ اس نشست پر امیدوار تھیں۔ پارٹی کے اندرونی حلقوں کا کہنا ہے کہ ضمنی انتخاب کے بعد میڈیا سے گفتگو میں بیرسٹر گوہر کے وہ بیانات جن میں انہوں نے ہلکے لفظوں میں نئی حکمت عملی کی طرف اشارہ کیا، دراصل اعلیٰ قیادت کی موجودہ سوچ کی عکاسی کرتے ہیں۔

ایک ذریعے نے کہا کہ ’’یہ بات واضح ہے کہ مقتدر حلقے اب بھی پی ٹی آئی کے مینڈیٹ کو پوری طرح تسلیم کرنے کو تیار نہیں‘‘ اور اسی احساس نے قیادت کو محاذ آرائی کے انداز پر ازسرنو غور کرنے کی طرف مائل کیا ہے۔

بیرسٹر گوہر علی خان کو طویل عرصے سے پی ٹی آئی کی معتدل آواز سمجھا جاتا ہے اور وہ تصادم اور محاذ آرائی کی بجائے مسلسل مذاکرات اور سیاسی عمل کو ترجیح دینے کی بات کرتے رہے ہیں۔

شاہ محمود قریشی اور کچھ زیر حراست رہنماؤں نے بھی مذاکرات کے آغاز کا کہا لیکن پارٹی کے اندر موجود محاذ آرائی کے حامیوں نے کبھی اس سمت قدم بڑھنے نہیں دیا۔

ذرائع کا کہنا ہے کہ ہری پور کی شکست نے پارٹی کے اندر معتدل سوچ رکھنے والے حلقے کی رائے کو مزید مضبوط کر دیا ہے اور اب زیادہ رہنما سمجھتے ہیں کہ آگے بڑھنے کا واحد قابل عمل راستہ مذاکرات پر مبنی سیاست ہے۔

تاہم حتمی فیصلہ پی ٹی آئی کے بانی چیئرمین عمران خان ہی کریں گے جو اب تک معتدل مزاج رہنماؤں کی بجائے محاذ آرائی کے حامیوں کی بات سنتے آئے ہیں۔